Беларусь і ААН створаць экспертную групу па Белавежскай пушчы

МІНСК, 17 ліс – Sputnik. Кіраўнік беларускага прыродаахоўнага ведамства Андрэй Худык і прадстаўнікі ААН дамовіліся стварыць сумесную экспертную групу па сітуацыі ў Белавежскай пушчы, паведамілі ў прэс-службе Мінпрыроды Беларусі.

Такое рашэнне было прынята напярэдадні на сустрэчы міністра з пастаянным каардынатарам ААН у Беларусі Іаанай Казанай-Вішнівецкай і пастаянным прадстаўніком ПРААН у рэспубліцы Аляксандрай Салаўёвай.

Удзельнікі перагавораў абмеркавалі пытанні супрацоўніцтва ў галіне аховы навакольнага асяроддзя, змякчэння наступстваў змянення клімату, а таксама рэалізацыі сумесна з ПРААН праектаў міжнароднай тэхнічнай дапамогі для выканання прыродаахоўных задач.

На сустрэчы Худык звярнуў асаблівую ўвагу, што міжнароднай супольнасці трэба як можна хутчэй заняцца ацэнкай сітуацыі ў Белавежскай пушчы. Пастаянны каардынатар ААН у Беларусі таксама ўсхвалявана гэтай сітуацыяй, дадалі ў ведамстве.

Худык таксама падкрэсліў, што санкцыйныя абмежаванні, уведзеныя некаторымі краінамі супраць Беларусі, перашкаджаюць рэспубліцы вырашаць экалагічныя задачы. Гэта, на думку міністра, можа паўплываць на стан экасістэм усяго еўрапейскага рэгіёна.

Бакі таксама абмеркавалі негатыўныя наступствы будаўніцтва агароджы на тэрыторыі аб’екта Сусветнай спадчыны ЮНЕСКА "Белавежская пушча".

Як адзначылі ў Мінпрыроды, загарода ўжо прывяла да шэрага сур’ёзных праблем. Сярод іх фрагментацыя ўнікальных рэліктавых лясоў, ахоўных месцаў пражывання чырвонакніжных жывёл, збядненне генафонду іх папуляцый, а таксама парушэнне гідралагічнага рэжыму сумежных экасістэм.

Бакі дамовіліся прадоўжыць сумесную работу і прыкласці максімум намаганняў, каб вырашыць рэгіянальныя і глабальныя выклікі ў галіне аховы навакольнага асяроддзя і змякчыць наступствы змянення клімату.

Агароджу на мяжы з Беларуссю краіны ЕС пачалі будаваць на фоне міграцыйнага крызісу. Яны абвінавацілі беларускія ўлады, што тыя адкрылі мяжу для транзіту ў Еўропу мігрантаў з краін Блізкага Усходу.

Спачатку Літва і Польшча ўстанавілі часовую загароду з калючага дроту – "канцэрціны", а затым прыступілі да ўзвядзення доўгатэрміновых канструкцый з металу. Пазней да такіх жа работ прыступіла Латвія.

Гэтым летам польскі бок завяршыў будаўніцтва агароджы на мяжы з Беларуссю. Даўжыня загароды – 186 кіламетраў, вышыня – пяць метраў. На ўсё гэта польскія ўлады патрацілі каля 400 мільёнаў долараў. Цяпер плот даабсталёўваюць камерамі начнога бачання і іншымі датчыкамі.

Загарода прайшла праз Белавежскую пушчу, што выклікала абурэнне сярод эколагаў і зоаабаронцаў, якія заяўляюць, што плот парушае міграцыйныя працэсы жывёл у запаведным лесе.