МІНСК, 13 сак – Sputnik. Прэзідэнт Беларусі Аляксандр Лукашэнка павіншаваў Папу Рымскага Францыска з 10-й гадавінай урачыстага пачатку Пантыфікату, тэкст размясціла прэс-служба беларускага лідара.
"Увесь гэты час Вы плённа працавалі на карысць міру, спакою і справядлівасці, дзяліліся з людзьмі святлом і мудрасцю", - падкрэсліў кіраўнік дзяржавы.
Лукашэнка адзначыў, што шмат у чым яго погляды і погляды кіраўніка РКЦ супадаюць. У прыватнасці, гэта датычыцца пытанняў пошуку міру ва Украіне і прыкладанні намаганняў для яго ўстанаўлення з боку як палітычных лідараў, так і звычайных грамадзян. Акрамя таго, існуе агульнасць поглядаў адносна пераасэнсавання наяўных у глабальнай палітыцы адносін.
"Згодны з Вамі, што ўвесь свет – гэта брацкія сувязі, заснаваныя на прабачэнні, яднанні, прымірэнні, а не на прыгнёце, паглынанні і навязванні сваіх поглядаў", - адзначыў Лукашэнка, удакладніўшы, што гэта адзін з пасылаў, якіх Беларусь прытрымліваецца ў рамках аб’яўленага ў краіне Года міру і стварэння.
Беларускі прэзідэнт мяркуе, што не ўсе падзяляюць імкненне слухаць і чуць адзін аднаго, весці перагаворы і супрацоўнічаць.
"Ужо які год мы спрабуем растлумачыць Захаду бесперспектыўнасць націску на Беларусь, важнасць дыялогу, заснаванага на ўзаемапавазе, традыцыях, каштоўнасцях і нацыянальных інтарэсах кожнай краіны", - гаворыцца ў віншаванні.
Ён выказаў упэўненасць у тым, што дзейнасць Францыска па забеспячэнні міру і дабрабыту ўсіх людзей добрай волі дасць свой вынік, і пажадаў кіраўніку рымскай каталіцкай царквы здароўя і сіл на многія гады.
Нагадаем, што ў мінулым годзе Лукашэнка выказаў надзею на асабістую сустрэчу з Францыскам. Папярэдні раз беларускі прэзідэнт сустракаўся з Папам Рымскім у 2016 годзе ў Ватыкане.
Папа Францыск
Папа Рымскі Францыск (Хорхе Марыё Бергольё) нарадзіўся 17 снежня 1936 года ў Буэнас-Айрэсе (Аргенціна) у сям’і італьянскіх эмігрантаў. Атрымаў адукацыю хіміка-тэхнолага, аднак вырашыў прыняць святы сан і паступіў у семінарыю Віла Дэвота ў Буэнас-Айрэсе. Быў пасвечаны ў сан свяшчэнніка 13 снежня 1969 года, 21 лютага 2001 года папа Ян Павел II узвёў Бергольё ў кардыналы.
11 лютага 2013 года Папа Рымскі Бенедыкт XVI абвясціў аб сваёй адстаўцы, якая набыла моц 28 лютага 2013 года.
13 сакавіка 2013 года архіепіскап Буэнас-Айрэса Хорхе Марыё Бергольё быў выбраны папам Рымскім пад імем Францыск.
Упершыню ў гісторыі рымска-каталіцкай царквы пантыфік прыняў папскае імя Францыск. Акрамя таго, гэта першы не еўрапеец і езуіт на Апостальскім прастоле.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Чытайце таксама:
Папа Рымскі хоча сустрэцца з Пуціным
Папа Рымскі лічыць, што Зяленскі павінен вярнуцца за стол перагавораў
Папа Рымскі лічыць, што была абвешчана трэцяя сусветная вайна