Беларускія лётчыкі, якія затрымаліся ў Судане, пакінулі краіну

МІНСК, 28 кра – Sputnik. Экіпаж самалёта Іл-76ТД кампаніі "БелКанта", які затрымаўся ў Судане, здолеў пакінуць краіну, зараз беларусы знаходзяцца ў Егіпце.

Як заявіў РІА Навіны генконсул Расіі ў Хургадзе Віктар Варапаеў, егіпецкія ўлады дапамаглі ім, а таксама двум расіянам, з уездам у краіну. Ім выдалі ўязныя візы ў чацвер, 27 красавіка.

Расійскі дыпламат таксама расказаў, што напярэдадні вечарам па тэлефоне экстранай сувязі да іх звярнуліся двое грамадзян Расіі і шэсць беларусаў, якія працавалі ў Судане па прыватных кантрактах. Яны прыбылі з Хартума на суданска-егіпецкі пагранпераход "Аркын". Па словах Варапаева, егіпецкія пагранічнікі не хацелі прапускаць іх на тэрыторыю краіны. Прычына адмовы – адсутнасць транспарту: суданскі кіроўца аўтобуса адмовіўся перасякаць мяжу. Генконсульства ў сваю чаргу звярнулася ў кампетэнтныя органы правінцыі Чырвонае мора.

У выніку расіянам і беларусам аказалі неабходнае садзейнічанне ў перасячэнні мяжы. Пасля гэтага грамадзяне Беларусі і Расіі адправіліся на аўтобусе ў Каір, адкуль маюць намер вылецець у Мінск і Маскву.

Раней у МЗС Беларусі праінфармавалі, што ў Судане знаходзяцца беларускія грамадзяне, у тым ліку экіпаж самалёта.

Самалёт кампаніі "БелКанта" прыбыў у Судан для правядзення работ па мадэрнізацыі і тэхнічным абслугоўванні, а экіпаж чакаў афармлення страхоўкі для палётаў над тэрыторыяй Турцыі.

Першапачаткова пілоты не маглі пакінуць Судан, бо перамяшчацца па краіне было небяспечна з-за боесутыкненняў.

Паўтара тыдня таму ў афрыканскай рэспубліцы пачаўся ўнутрыпалітычны крызіс з-за канфлікту паміж кіраўніком пераходнага суверэннага савета Судана і яго намеснікам. Супрацьстаянне праходзіла з выкарыстаннем зброі.

У выніку заложнікамі сітуацыі сталі шматлікія замежныя грамадзяне.

МЗС Беларусі рэкамендаваў грамадзянам рэспублікі ўстрымацца ад паездак у гэтую афрыканскую краіну.

У цяперашні час супрацьлеглыя бакі дасягнулі пагаднення аб часовым спыненні агню і гатовы сесці за стол перагавораў.