Два аб’екты ўнутраных войск дадалі ў дзяржінвестпраграму Беларусі

МІНСК, 10 чэр – Sputnik. Беларускі ўрад прыняў рашэнне дадаць два аб’екты ўнутраных войск у дзяржаўную інвестыцыйную праграму на 2023 год, гэта прадугледжана пастановай Саўміна №363 ад 3 чэрвеня, якая афіцыйна апублікавана ў аўторак на Нацыянальным прававым інтэрнэт-партале.

Так, у пералік будоўляў і аб'ектаў дзяржінвестпраграмы дадалі два новыя пункты.

Гэта ўзвядзенне спецыялізаванага будынка з добраўпарадкаваннем тэрыторыі вайсковай часці 5526 горада Брэста. На рэалізацыю гэтага праекта можа быць накіравана да 200 тысяч беларускіх рублёў.

Таксама ў рамках рэалізацыі інвестыцыйнай праграмы зараз прадугледжана рэканструкцыя аб'ектаў аўтапарка вайсковай часці 5448 горада Мінска.

Ліміт фінансавання на гэтыя мэты вызначаны ў памеры 400 тысяч рублёў.

Міністэрству фінансаў даручана выдзеліць на гэтыя аб’екты з рэспубліканскага бюджэту 600 тысяч беларускіх рублёў. Зрабіць гэта мяркуецца за кошт сродкаў, якія прадугледжаны дзяржаўнай інвестыцыйнай праграмай на 2023 год.

Мінэканомікі ў сваю чаргу трэба будзе падрыхтаваць пастанову, якой у дзяржінвестпраграму будуць унесены змяненні з улікам гэтых двух аб’ектаў і сродкаў на іх фінансаванне.

Дзяржаўная інвестыцыйная праграма на бягучы год была зацверджана кіраўніком беларускай дзяржавы Аляксандрам Лукашэнкам 7 лютага.

Згодна з праграмай, у 2023 годзе плануецца праектаванне і будаўніцтва 136 аб’ектаў, з іх 53 плануецца здаць у эксплуатацыю.

На фінансаванне ўключаных у праграму аб’ектаў прадугледжана амаль 1,15 мільярда беларускіх рублёў, з іх 891 мільён ці 78% будзе накіравана на рэалізацыю шэрага дзяржпраграм.

У адпаведнасці з праграмай у гэтым годзе пачнецца фінансаванне будаўніцтва (рэканструкцыі) 23 аб’ектаў, у тым ліку трох пуцеправодаў у Брэсцкай, Гомельскай і Гродзенскай абласцях, трох дзіцячых дамоў сямейнага тыпу ў Полацку, Бабруйску і Бешанковічах, дзвюх бальніц у Брэсце і Пінску.