Нумар люкс і хамам: як Гомель прыняў расіян на Гульнях краін СНД – відэа

Расійскіх спартсменаў засялілі ў гасцініцу "Турыст" у аднамесныя і двухмесныя нумары. Адразу пасля сняданку дзюдаісты адправіліся на трэніроўку. Гомель яны пакуль што паспелі разгледзець толькі з акна брэндаванага аўтобуса, аднак арганізатары запэўнілі, што ўбачыць славутасці спартсмены змогуць у зручны для іх час: для каманд падрыхтаваны турыстычныя пакеты, яны самі выбяруць, што наведаць і калі.

Канцэпцыя рассялення ў гасцініцы – увесь паверх засяляюць прадстаўнікі адной краіны. І толькі каманды з Узбекістана і Манголіі суседнічаюць на адным паверсе. Напярэдадні ўжо засялілі больш за 190 спартсменаў.

Спартсменка з Расіі Айшат Аліева па просьбе карэспандэнта Sputnik праводзіць экскурсію. У нумары двухспальны ложак, зручныя крэслы, канапа, ванны пакой, неабходная бытавая тэхніка і нават тапачкі. Са слоў спартсменкі, усё дастаткова сучасна, сэрвіс добры.

Свае сілы расійскія дзюдаісты ацэньваюць высока і ў ліку наймацнейшых канкурэнтаў вылучаюць прадстаўнікоў сваёй краіны. "Будзе больш складана спаборнічаць са сваімі ж, расіянамі, паколькі разам трэніраваліся, ведаем іх моцныя і слабыя бакі, а яны нашы", - падзяліліся дзяўчаты.

У сваю чаргу галоўны трэнер зборнай Расіі па дзюдо сярод дзяўчат Флора Мхітаран да ліку дастойных канкурэнтаў на спартыўных спаборніцтвах дадае дзюдаістаў з Азербайджана, Узбекістана і Беларусі. "Пляцоўка, разміначная і спаборніцкая залы адпавядаюць усім еўрапейскім стандартам", - высока ацаніла добрую арганізацыю суразмоўніца і выказала надзею, што паспрабуе беларускія дранікі.

У трэнерскага складу, дарэчы, нумары катэгорыі "Люкс" з прыгожым відам на ціхі дворык. Апартаменты прасторныя, з пакоем для сну і адпачынку, акуратнай ваннай, дзе толькі для віпаў прадугледжаны белыя махровыя халаты.

За асобную плату ўсе пастаяльцы гасцініцы могуць наведаць хамам, спартыўную залу, басейн, папарыцца ў кедравай бочцы і нават арганізаваць банкет у асобным пакоі.