Новыя нормы расходаў вады і цяпла вызначаны ў Беларусі

МІНСК, 26 жні – Sputnik. Міністэрства жыллёва-камунальнай гаспадаркі вызначыла нормы страт і накладных расходаў цяпла і вады на 2024 год, адпаведная пастанова ведамства №12 апублікавана на Нацыянальным прававым інтэрнэт-партале.

Нормы дакумента датычацца арганізацый ЖКГ, якія эксплуатуюць жыллёвы фонд або прадастаўляюць жыллёва-камунальныя паслугі. У ім гаворыцца, што нарматывы тэхналагічных страт цеплавой энергіі для такіх арганізацый павінны складаць не больш за 9,2% (у 2023-м – 9,4%), а няўлічаных расходаў вады – не больш за 12%.

Выдаткі на паслугі па халодным водазабеспячэнні не павінны перавышаць 0,2168 рубля на 1 кубаметр рэалізаванай вады, па водаадвядзенні – не больш за 0,1657 рубля за кубаметр адведзеных сцёкаў у каналізацыю.

На цеплазабеспячэнне і гарачае водазабеспячэнне – не больш за 12,7562 рубля на адну гігакаларыю, на тэхнічнае абслугоўванне жылога дома – не больш за 0,0274 рубля на 1 квадратны метр агульнай плошчы жылога памяшкання.

Зменены нормы накладных расходаў па абыходжанні з цвёрдымі камунальнымі адходамі: на 1 кубаметр ТКА – не больш за 1,5015 рубля; на 1 тону адходаў – не больш за 10,7337 рубля.

Выдаткі на абслугоўванне ліфта ў 2024 годзе не павінны быць больш за 0,0190 рублі на 1 квадратны метр агульнай плошчы жылога памяшкання.

Ва ўсіх выпадках расходы на вышэйпералічаныя жыллёва-камунальныя паслугі павялічаны ў параўнанні з 2023 годам.

Нагадаем, тарыфы на жыллёва-камунальныя паслугі павышаюцца ў Беларусі два разы за год: з 1 студзеня і 1 чэрвеня. Раней рост камуналкі абмяжоўвалі доларавым эквівалентам. На працягу года сярэднестатыстычная жыроўка на двухпакаёвую кватэру з трыма жыхарамі магла "пацяжэць" не больш чым на пяць долараў (15,7 рублёў па курсе Нацбанка РБ на 22 жніўня 2023).

У чэрвені 2023 года прэзідэнт Беларусі Аляксандр Лукашэнка падпісаў указ, у якім гаворыцца, што ЖКП можна будзе павышаць не больш як на палову базавай велічыні (цяпер гэта сума роўная 18 руб 50 кап).