Стандарты па малочных прадуктах мяняюцца ў ЕАЭС: у вытворцаў паўгода

МІНСК, 23 вер – Sputnik. Напярэдадні ўступіла ў сілу рашэнне Савета Еўразійскай эканамічнай камісіі (ЕЭК) ад 23 верасня 2022 года №143 аб стандартах малочнай прадукцыі, вынікае з тэксту гэтага дакумента.

Змяненні ў тэхнічны рэгламент аб бяспецы малака і малочнай прадукцыі пры гэтым пачынаюць дзейнічаць не імгненна. Калегія ЕЭК дала ўдзельнікам рынку на адаптацыю 180 дзён.

У ЕАЭС для малочнай галіны ўводзяцца некаторыя новыя паняцці. Напрыклад, гэта "пабочны прадукт перапрацоўкі малака канцэнтраваны, згушчаны". Маецца на ўвазе такі пабочны прадукт, дзе доля сухіх рэчываў – не менш за 16%.

У той жа час у стандартах пакуль не з’явіўся тэрмін "згушчонка". Ёсць "згушчаныя з цукрам вяршкі", "згушчанае з цукрам цэльнае малако" і іншыя падобныя назвы. Гэта азначае, што вытворцы і далей маюць права выпускаць прадукт са словам "згушчонка" на ўпакоўцы, у якім выкарыстоўваюцца заменнікі малочнага тлушчу, пальмавае масла і іншыя кампаненты. Але гэта фактычна – не згушчаныя вяршкі і не згушчанае малако.

У змененых стандартах з’явіўся такі новы від прадукта як "марожанае малакозмяшчальнае". Масавая доля малочнага тлушчу ў ім павінна быць ад 1% да 6%. Сухі абястлушчаны малочны астатак, паказчык, які выкарыстоўваюць пры экспертызе, – ад 3% да 6%.

Для параўнання: у пламбіры гэта 7-10%, у сметанковым – 7-11%, малочным – 7-11,5%, кісламалочным – 7-11,5%. Нават у марожаным з заменнікам малочнага тлушчу паказчык па стандарце – 7-11%.

Масавая доля тлушчу ў ёгурце раней была мінімум 0,1% і максімум 10%. Цяпер пакідаюць толькі верхні парог тлустасці. Астатнія паказчыкі па гэтым прадукце ранейшыя.

Крыху змянілася вызначэнне тварожнай масы. Аўтары дакумента прыбралі фразу аб тым, што ў яе можна дадаваць згушчанае малако з цукрам.

З’явілася пазіцыя "Кісламалочныя прадукты, вырабленыя з дабаўленнем вады". Доля тлушчу ў іх можа быць не больш за 9,9%. Сухі абястлушчаны малочны астатак – не менш за 3,9%. У звычайных кісламалочных прадуктах (акрамя ёгурта, смятаны і тварагу) – не менш за 7,8%.