Генпракуратура ўдакладніла колькасць ахвяр "Трасцянца", іх больш за паўмільёна

МІНСК, 5 кас – Sputnik. Да ўзбуджэння крымінальнай справы аб генацыдзе афіцыйна лічылася, што ў лагеры смерці "Трасцянец" у гады вайны загінулі 220-240 тысяч чалавек, але пасля працы з архіўнымі дакументамі высветлілася, што рэальная колькасць ахвяр перавышае гэтыя даныя больш чым у два разы. Пра гэта генпракурор Андрэй Швед расказаў падчас сустрэчы з кіраўніцтвам і супрацоўнікамі мытнай службы ў чацвер.

Падчас Другой сусветнай вайны на тэрыторыі Беларусі дзейнічала мноства нацысцкіх лагераў, "Трасцянец" быў з самых буйных, туды нацысты звазілі жыхароў СССР і еўрапейскіх краін. Генпракурор расказаў аб рэальных маштабах трагедыі.

Паводле яго слоў, вельмі важна аб’ектыўна падаваць гісторыю, не забывацца на рэальнае значэнне Перамогі.

"Памяць аб Перамозе трэба не толькі захоўваць, але і расказваць пра яе нашым дзецям. У 1945 годзе фашызм і нацызм не былі пераможаны, пра гэта нам не гаварылі. Многія нацысцкія злачынцы знайшлі прытулак на Захадзе і ўвайшлі ў палітычныя эліты. Пра гэта трэба гаварыць", - дадаў генпракурор.

Крымінальную справу аб генацыдзе беларускага народа ў гады Вялікай Айчыннай вайны Генеральная пракуратура Беларусі ўзбудзіла вясной 2021 года. У рамках расследавання Мінск супрацоўнічае з шэрагам краін, асаблівую дапамогу ў гэтым пытанні аказвае Расійская Федэрацыя. Беларускія пракуроры і следчыя дапушчаны ў расійскія архівы для працы з дакументамі аб генацыдзе.

Генпракуратура накіравала амаль у 30 краін запыты аб аказанні прававой дапамогі ў расследаванне справы. Польшча, Літва, Латвія і Эстонія ад супрацоўніцтва адмовіліся.