МІНСК, 14 сту – Sputnik. Жыхары Беларусі ў першы тыдзень новага 2024 года набылі лічбавыя аблігацыі (токены) айчынных кампаній на 5,5 мільёна рублёў, паведаміў Sputnik Беларусь аператар платформы па продажы токенаў.
"Людзі інвесціравалі значныя сумы 1-2 студзеня, а таксама 6-7-га. Самым жа "інвестыцыйным" днём першага тыдня года можна назваць пятніцу (5 студзеня - Sputnik)", - распавялі ў кампаніі "ДФС".
Пры гэтым, як правіла, куплялі токены, якія намініраваны ў доларах. Аналітыкі "ДФС" лічаць гэта збегам некалькіх абставін. Галоўная з іх – высокія стаўкі даходнасці новых выпускаў, якія вар’іруюцца ад 8 да 10% гадавых.
Другое месца занялі актывы ў еўра. У гэтым сегменце ў асноўным куплялі токены дзяржпрадпрыемства "Гродна Азот", якое прыцягнула грошы пад 5% гадавых. Таксама ўсё часцей беларускія інвестары сталі набываць токены ў нацвалюце.
"Гэтаму садзейнічаюць высокія стаўкі даходнасці – да 21,5% гадавых. Таксама шмат кампаній-эмітэнтаў зацікаўлена ў прыцягненні інвестыцый менавіта ў айчыннай валюце", - адзначылі ў "ДФС".
Замыкае інвестыцыйны кошык валют – расійскі рубель. Пры гэтым токены ў гэтай валюце прадаюць эмітэнты як з Беларусі, так і з Расіі. Судзячы па статыстыцы продажу, інвестары больш давяраюць айчынным кампаніям.
У "ДФС" таксама адзначылі, што ў іншыя гады студзеньскі продаж не быў такі маштабны. Напрыклад, у першы тыдзень 2023 года аб’ём інвестыцый складаў 195 тысяч долараў у эквіваленце (цяпер - 1,7 мільёна рублёў).
"ДФС" (Finstore) – гэта даччыная кампанія банка "БелВЭБ", якая з’яўляецца рэзідэнтам ПВТ. Банк у сваю чаргу належыць расійскай дзяржкарпарацыі "ВЭБ.РФ".
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"