Багародзічны Вялікдзень: праваслаўныя адзначаюць Прачыстую

МІНСК, 28 жні – Sputnik. Праваслаўны свет адзначае свята Успення Божай Маці, або Прачыстую, яно аднесена да вялікіх дванадзесятых свят рэлігійнага календара.

Свята ўстаноўлена ў памяць аб смерці Багародзіцы. Пасля смерці і пахавання яна была цялеснай узнесена на нябёсы.

Напярэдадні свята прадстаяцель беларускай праваслаўнай царквы мітрапаліт Мінскі і Заслаўскі Веніямін здзейсніў усяночнае дбанне ва Успенскім саборы Жыровіцкага манастыра.

Нагадаем, што ў панядзелак завяршыўся ўсебеларускі Хрэсны ход, які стартаваў 18 жніўня з Жыровіч. Яго ўдзельнікі за дзевяць дзён наведалі больш за 20 храмаў у чатырох епархіях і прайшлі каля 250 км.

Прасвятая Дзева Марыя памерла ў Іерусаліме ў 57 годзе ад Нараджэння Хрыстовага. Усе апосталы прыбылі ў Іерусалім да яе ложа, каб развітацца з Багародзіцай і здзейсніць пахаванне цела.

У царкоўнай традыцыі не прынята называць скон Багародзіцы смерцю, ужываюць слова "ўспенне". Смерць Божай Маці была незвычайнай – гэта быў як бы нядоўгі сон, за якім рушыў услед яе пераход у вечнае жыццё.

У межах праваслаўнай царквы шмат Успенскіх багародзічных храмаў, у кожнай царкве ёсць і абразы, прысвечаныя Успенню Прасвятой Багародзіцы.

Згодна з традыцыйнымі іканапіснымі канонамі, каля памерлай Багародзіцы знаходзяцца апосталы, побач – Збавіцель Ісус Хрыстос, які трымае немаўля – сімвал нявіннай душы Марыі.

Падчас Успенскага богаслужэння свяшчэннікі апрануты ў адзенне блакітнага і залатога колеру. Таксама ў гэты дзень храмы ўпрыгожаны белымі кветкамі.

Успеннем Багародзіцы завяршаецца літургічны год у праваслаўных.