МІНСК, 3 сту - Sputnik. Беларускія НПЗ знізілі загрузку да тэхналагічнага мінімуму пасля спынення паставак нафты з Расіі, а "Белнафтахім" прапрацоўвае кантракты на пастаўку нафты з іншых крыніц, пра гэта Sputnik паведамілі ў канцэрне.
У "Белнафтахіме" пацвердзілі інфармацыю аб тым, што з 1 студзеня спыненыя пастаўкі нафты на беларускія НПЗ з Расіі. У той жа час прадпрыемствы працягваюць працаваць, выкарыстоўваючы запасы сыравіны, зробленыя раней, аднак не на поўную магутнасць.
"У дадзены момант загрузка абодвух НПЗ зніжана да тэхналагічнага мінімуму. Яны працуюць на рэштках сыравіны, назапашаных у снежні", - распавялі ў прэс-службе "Белнафтахіма".
У канцэрне таксама пацвердзілі, што кантракт на пастаўку нафты з Расіі па-ранейшаму не заключаны. У сувязі з гэтым цяпер прапрацоўваюцца іншыя варыянты паставак сыравіны.
"Канцэрн заняты прапрацоўкай кантрактаў на пастаўку нафты ў студзені не толькі з Расіі, але і з іншых магчымых крыніц", - распавялі там.
Не дамовіліся
Нагадаем, 31 снежня стала вядома, што Беларусі і Расіі так і не ўдалося дамовіцца аб пастаўках нафты на 2020 год, нягледзячы на тое, што папярэднія дамоўленасці мінулі. Расійскі бок прапанаваў не абмяркоўваць апакаліптычныя сцэнары развіцця сітуацыі і адзначыў, што перамовы будуць працягвацца.
У апошні дзень 2019 года прэзідэнт Беларусі Аляксандр Лукашэнка даручыў знайсці альтэрнатыўныя крыніцы пастаўкі нафты ў Беларусь. Кіраўнік дзяржавы запатрабаваў у бліжэйшыя дні забяспечыць экспарт нафты з альтэрнатыўных крыніц. У першую чаргу, гаворка ішла аб дастаўцы сыравіны чыгуначным транспартам з партоў на Балтыцы, а таксама задзейнічанні для альтэрнатыўных паставак нафтаправода "Дружба".
