МІНСК, 16 сне — Sputnik. Дэпутаты Палаты прадстаўнікоў прынялі ў першым чытанні праект закона "Аб унясенні змяненняў і дапаўненняў у закон" Аб дзяржаўных дапамогах сем'ям, якія выхоўваюць дзяцей", які прадугледжвае ўзмацненне мер дзяржпадтрымкі слаба абароненых катэгорый насельніцтва.
Прадстаўляючы законапраект парламентарыям, намеснік міністра працы і сацыяльнай абароны Беларусі Аляксандр Румак паведаміў, што адна з паправак прадугледжвае павышэнне памеру дапамогі па догляду дзіцяці-інваліда, якому ўстаноўлена трэцяя ці чацвёртая ступень страты здароўя. Зараз памер дапамогі складае 100% бюджэту пражытковага мінімуму, але пасля ўступлення закона ў сілу дапамога павялічыцца да 120% БПМ.
На ўлік па цяжарнасці — у прыватныя медцэнтры
Яшчэ адна папраўка прадугледжвае, што жанчыны, якія становяцца на ўлік па цяжарнасці да 12-тыднёвага тэрміну, будуць мець права на дапамогу, калі яны ўсталі на ўлік не ў дзяржаўных, а ў прыватных арганізацыях аховы здароўя.
У цяперашні час жанчыны, якія ўсталі на ўлік па цяжарнасці да 12-тыднёвага тэрміну, маюць права на дапамогу, толькі калі яны ўсталі на ўлік у дзяржаўнай установе аховы здароўя.
Гэта не першы крок дзяржавы ў бок прыватнай медыцыны: раней недзяржаўным клінікам дазволілі выдаваць бальнічныя лісты.
Дапамога да паўналецця
Акрамя таго, распавёў Румак, у Беларусі плануецца даць права сем'ям, у якіх бацькі з'яўляюцца інвалідамі першай або другой групы, або адзін з бацькоў з'яўляецца інвалідам першай групы, а другі ажыццяўляе за ім догляд, атрымліваць дапамогу на дзяцей старэйшых за 3 гады да дасягнення імі 18- гадовага ўзросту.
Пры гэтым не будзе ўлічвацца тое, што дзеці навучаюцца ў навучальных установах на бясплатнай аснове.
У цяперашні час па заканадаўстве сем'і, дзе бацькі з'яўляюцца інвалідамі, пазбаўляюцца права на дапамогу пры паступленні дзіцяці ў ПТВ, ССНУ або ВНУ на бюджэт. Атрыманне дапамогі таксама спыняецца па дасягненні дзіцем 16 гадоў, калі ён не навучаецца ў навучальнай установе.
Яшчэ адна навіна тычыцца прадастаўлення права маці (мачысе), бацьку (айчыму), усынавіцелю (удачарыцелю), апекуну або папячыцелю, калі яны ажыццяўляюць догляд за дзецьмі-інвалідамі да дасягнення імі 18-гадовага ўзросту, працаваць на ўмовах няпоўнай занятасці, у тым ліку выконваць працу на хаце, і атрымліваць дапамогу па доглядзе дзіцяці-інваліда. Гэта права будзе захоўвацца ў выпадку атрымання бацькамі пенсіі або штомесячнай страхавой выплаты.
Згодна з беларускім заканадаўствам, закон уступае ў сілу пасля таго, як ён прыняты ў двух чытаннях ніжняй палатай парламента, ухвалены Саветам рэспублікі, падпісаны прэзідэнтам і афіцыйна апублікаваны.
