МІНСК, 20 ліп — Sputnik. Генеральная пракуратура выявіла парушэнні выкарыстання помнікаў гісторыка-культурнай спадчыны, інфармацыя накіраваная ва ўрад, да адказнасці прыцягнулі кіраўніцтва Міністэрства культуры, паведамілі ў прэс-службе нагляднага ведамства.
Генеральная пракуратура правяла праверку выканання заканадаўства, якое рэгулюе парадак ажыццяўлення прадпрымальніцкай дзейнасці пры выкарыстанні аб'ектаў гісторыка-культурнай спадчыны.
Па законе ІП павінны адлічваць грошы за прадпрымальніцкую дзейнасць, якая аказвае ўздзеянне на гісторыка-культурную каштоўнасць, здзяйсняць выплату кампенсацый за шкоду, прычыненую такім будынкам.
"У ходзе праверкі было ўстаноўлена, што дадзеныя патрабаванні ў поўнай меры не выконваліся, у тым ліку з прычыны неналежнага кантролю з боку кіраўніцтва Мінкультуры і мясцовых выканаўчых камітэтаў", — паведамілі Sputnik у чацвер у прэс-службе Генпракуратуры.
Трубы і кандыцыянеры на фасадах
Нярэдка на фасадах гістарычных будынкаў, якія выкарыстоўваюць прадпрымальнікі, былі змантаваныя трубы, выцяжкі, прамысловыя кандыцыянеры, а на дахах — антэны аператараў сотавай сувязі.
У Генпракуратуры падкрэслілі, што адлічэнні за іх трэба рабіць штогод ад прыбытку пры ажыццяўленні дзейнасці, якая аказвае непасрэднае ўздзеянне на гісторыка-культурную каштоўнасць.
"Аналіз сітуацыі, якая склалася, паказаў, што адлічэнні насілі адзінкавы характар і не былі звязаны з рэалізацыяй норм заканадаўства", — сказалі суразмоўцы Sputnik.
"Для ліквідацыі выяўленых парушэнняў Генпракуратурай у Савет міністраў накіравана адпаведная інфармацыя, у Міністэрства культуры ўнесена прадстаўленне. Па выніках разгляду актаў пракурорскага нагляду да дысцыплінарнай адказнасці прыцягнуты міністр культуры", — паведамілі ў прэс-службе.
Усіх пералічылі
Акрамя таго, былі праведзены мерапрыемствы па выяўленні і ўліку суб'ектаў гаспадарання, дзейнасць якіх аказвае непасрэднае ўздзеянне на аб'екты гісторыі і культуры, адзначылі ў наглядным ведамстве. "У цяперашні час налічваецца больш за дзве тысячы плацельшчыкаў", — сказалі суразмоўцы агенцтва.
У Генпракуратуры таксама адзначылі, што прынятыя пракурорамі меры далі магчымасць у гэтым годзе накіраваць на аднаўленне помнікаў гісторыка-культурнай спадчыны больш за 400 тысяч рублёў. "У параўнанні з 2016 годам гэта больш у 16 разоў", — удакладнілі ў прэс-службе.
Грошы, у прыватнасці, пайшлі на фінансаванне работ па капітальным рамонце Каложскай царквы ў Гродне, кансервацыі Княжацкай вежы замка ў Крэве, рэстаўрацыі адпластаваных фрэскавых роспісаў у Спаса-Праабражэнскай царквы ў Полацку.
