На адзін дзень панадворак Новага замка ў Гродне ператварыўся ў сярэднявечны ваенны лагер. Тут праходзіў гістарычны фестываль "Дні Стэфана Баторыя".
На фэсце сабралася больш за 50 удзельнікаў клубаў, якія займаюцца рэканструкцыяй эпохі караля Стэфана Баторыя — з Польшчы, Беларусі і Чэхіі. У Гродне яны на адзін дзень разгарнулі палявы лагер і наладзілі рэканструкцыю бітвы сярэдзіны XVI стагоддзя.
Воіны і іх дамы размясціліся на лужку ва ўнутраным дворыку Новага замка. Уваход для гараджан і шматлікіх турыстаў быў вольны. Кожны мог бясплатна прымерыць касцюм польскай і беларускай шляхты, надзець шлем і нават патрымаць у руках шаблю.
Гасцям прапаноўвалі і больш актыўныя забавы — напрыклад, пазмагацца з навучаным гусарам на шаблях, праўда, не сапраўдных. Спадарожніцы гусараў прапаноўвалі паказаць крокі паланэза.
Самай відовішчнай стала рэканструкцыя бітвы. З аднаго боку змагаліся войскі шведаў і Радзівілаў, з другога боку — польска-літоўская армія гусараў. Гледачам паказалі не толькі баі, але і падрыхтоўку да іх. Напрыклад, абавязковай часткай стала малітва перад боем.
Бітва доўжылася не больш за пяць хвілін. На баку арміі Стэфана Баторыя з самага пачатку была перавага па сілах. Воіны смела ішлі адзін на аднаго з шаблямі, а ўмоўна параненыя і забітыя байцы падалі на зямлю.
У фінале бітвы шведы патрапілі ў акружэнне і вымушаныя былі здацца. Затым воіны, як і належыць на любой вайне, паднялі келіхі і разбрыліся абедаць у мясцовыя кафэ.
Гістарычны фестываль "Дні Стэфана Баторыя ў Гродне" праходзіць у трэці раз. Горад абраны не выпадкова — у канцы XVI стагоддзя Стары замак служыў каралеўскай рэзідэнцыяй Стэфана Баторыя. У гэтым годзе фестываль пашырыў межы. Пасля Гродна клубы выступяць у Міры, Лідзе і заедуць у Навагрудак.
