МІНСК, 19 кра - Sputnik, Леў Рыжкоў. Дзявяты Міжнародны форум "Вялікая Перамога, здабытая адзінствам" адкрыецца ў Санкт-Пецярбургу 25 красавіка, у яго працы прымуць удзел больш за 250 дэлегатаў з краін былога СССР.
На прэс-канферэнцыі ў Маскве арганізатары паабяцалі, што форум будзе не сумным і далёкім ад афіцыёзу.
Лейтматывам форуму стане 75-годдзе зняцця блакады Ленінграда. У дыялогу прымуць удзел дэлегаты з усіх дзяржаў Садружнасці, краін Балтыі, Грузіі, ветэраны блакады і іх нашчадкі, прадстаўнікі грамадскіх арганізацый, удзельнікі пошукавых рухаў, навукоўцы, гісторыкі, палітолагі, прадстаўнікі творчай інтэлігенцыі і СМІ.
"Сёння ў асэнсаванні гісторыі Другой сусветнай вайны з'яўляюцца новыя пункты гледжання, якіх не было раней. Пляцоўка, на якой сустракаюцца гісторыкі новых краін, дзе яны могуць растлумачыць для сябе падрабязнасці многіх падзей, - гэта вельмі важная справа. Мы імкнёмся прыцягнуць да працы прафесіяналаў. Праблема ў тым, што сёння асэнсаваннем гісторыі часта займаюцца публіцысты-інтэрпрэтатары, а не прафесіяналы, якія сапраўды валодаюць поўным аб'ёмам матэрыялу", - сказаў на прэс-канферэнцыі сустаршыня праўлення Міждзяржаўнага фонду гуманітарнага супрацоўніцтва дзяржаў-удзельніц СНД Міхаіл Швыдкой.
Ён таксама адзначыў, што праца форуму павінна быць максімальна свабоднай ад афіцыёзу і заарганізаванасці, цікавай перш за ўсё маладым людзям.
"На жаль, 75-годдзе Перамогі - гэта тая мяжа, якая аддзеліць ад зямнога існавання пераважную большасць ветэранаў, і яны будуць існаваць толькі ў нашай памяці. Маё пакаленне заўсёды ганарылася, што мы дзеці пераможцаў. Мы нарадзіліся адразу пасля вайны. Але і нам ужо нямала гадоў. Важна зразумець, што памяць аб вайне будуць захоўваць людзі, якія не ваявалі, якія нават не былі дзецьмі падчас вайны", - падкрэсліў Швыдкой.
Цяпер урады некаторых постсавецкіх краін не падтрымліваюць расійскую трактоўку гістарычных падзей, адзначыў Швыдкой. А Расія ніколі не пагадзіцца з гераізацыяй нацысцкіх памагатых у краінах Балтыі і ва Украіне. Але разыходжанні афіцыйнай гістарыяграфіі не павінны перашкодзіць усталяванню гарызантальных, агульначалавечых сувязяў паміж краінамі.
"Мы пастараемся, каб пляцоўка форуму стала не чарговай трыбунай для феерверкаў і пераможных салютаў, а тым месцам, дзе людзі маглі б сустрэцца, пагаварыць, адчуць блізкасць. Гэта пляцоўка, дзе людзі задумаюцца, якую мадэль будучага мы будзем выбудоўваць, маючы такое слаўнае мінулае", - сказаў Швыдкой.
"Мы, народы СССР, ваявалі разам і разам перамаглі - гэты факт не можа быць падвергнуты ніякаму сумневу", - падкрэсліў ён.
Чытайце таксама:
- Вершы пра Перамогу: лепшыя творы беларускіх паэтаў
- Прэзідэнт даручыў выплаціць ветэранам аднаразовую матэрыяльную дапамогу
- Ветэранаў ВАВ стала ў 2,5 разы менш: самаму маладому - 92 гады
