Як шанавалі Берагіню ў пасёлку Акцябрскі

Новую "Берагіню" прыйшлося чакаць тры гады. Але ж нездарма!

На свята завіталі фальклорныя калектывы з усіх абласцей Беларусі.

Некаторыя ўдзельнікі прыехалі нават сем'ямі.

Фестываль названы у гонар славянскай багіні Берагіні, якая з даўніх часоў павінна была аберагаць нашых продкаў і зберагаць усё чыстае, што ёсць на зямлі.

Беларусы рабілі здаўна Берагіню ў выглядзе абрадавай лялькі (і абавязкова без твара!) ды захоўвалі яе ў хаце цэлы год.

Лічылася, што абрадавая лялька Берагіні спрыяе дабрабыту і адводзіць няшчасце, дзякуючы чаму ў сям'і пануе згода, а ў хаце, як кажуць, "з рога ўсяго многа".

Асобнае месца на фестывалі належыла рамеснікам. І якіх толькі промыслаў тут не было! Пляценне і іншыя вырабы з саломкі - старажытнае мастацтва ўсходніх славян.

Гліняныя свістулькі - якія, перш за ўсё, ассацыіруюцца з гуканнем Вясны - здаўна папулярная дзіцячая забава.

Каб выразаць з дрэва сталовыя прыборы і не толькі, трэба мець талент і... цвёрдую руку.

А колькі прыгажосці можна было выткаць раней на кроснах!

Кожны беларускі ручнік - сапраўдны шэдэўр, у які ўкладзена шмат працы і натхнення.

І нават старажытныя беларускія настойкі - таксама асаблівы від творчасці.

Мясцовыя Берагіні с кожнай вобласці прэзентавалі духмяныя пірагі.

А святочная сцэна фестывалю ўвабрала ў сабе столькі імпэту і спрыту, што ніводны танцор, як і гледачы, не застаўся без добрага настрою.

У Акцябрскім танцавалі і маладыя хлопцы і дзяўчаты...

...і старыя, якія не жадалі адставаць ад моладзі.

Але ж - куды там! Танцавальнае сола - быццам сонечнае кола - высокае і натхняючае!

І пакуль адны ўдзельнікі выступалі, другія і проста гледачы - весела падбадзёрывалі іх.

Ды і якое ж свята без сапраўднага музыкі...

...і кранаючых за сэрца фестывальных спеваў!

А яшчэ ж і святочны стол з прысмакамі і старажытнымі стравамі.

Урэшце - свята адбылося!