Супрацоўнікаў МНС хочуць узброіць: з чаго іх навучаць страляць?
12:21 07.02.2022 (абноўлена: 12:30 07.02.2022)
© Sputnik / Виктор Толочко
Падпісацца
Структуру сістэмы міністэрства па надзвычайных сітуацыях у бліжэйшы час удасканаляць, адно з пытанняў - узбраенне супрацоўнікаў.
МІНСК, 7 лют – Sputnik. Супрацоўнікам МНС Беларусі могуць выдаць зброю, каб у выпадку канфлікту яны маглі быць задзейнічаны ў ваенных дзеяннях, заявіў у панядзелак прэзідэнт краіны Аляксандр Лукашэнка на нарадзе па ўдасканаленні структуры ведамства.
Нагадаем, раней МУС заяўляла, што баявую зброю атрымаюць паштальёны. Пісталет ці рэвальвер змогуць мець пры сабе супрацоўнікі "Белпошты" - начальнікі вузлоў сувязі, начальнікі ўчастка, начальнікі аддзяленняў сувязі, начальнікі галоўнай касы, аператары сувязі (яны атрымаюць яшчэ і аўтамат), паштальёны, вадзіцелі. Доступ да зброі атрымаюць і работнікі дзяржпрадпрыемства "Спецыяльная сувязь" - фельд'егеры па спецыяльных даручэннях і іншыя.
Кіраўнік дзяржавы нагадаў, што ён раней ужо даваў распараджэнне вызначыць, якім супрацоўнікам неабходна выдаць агнястрэльную зброю і падрыхтаваць у выпадку чаго да баявых дзеянняў.
"Хацелася б пачуць, наколькі мы рушылі наперад у гэтым плане, каб МНС стала сілавым блокам па-сапраўднаму, колькі людзей у нас будзе валодаць зброяй не горш, чым у арміі і міліцыі", - адзначыў Лукашэнка.
Дужыя хлопцы і дзяўчаты
Прэзідэнт Беларусі адзначыў, што беларускія ратавальнікі - адны з лепшых у свеце, заўсёды ў лідэрах па пажарна-выратавальным спорце, а выпраўку паказваюць не горш за ваенных.
"Супрацоўнікі МНС - хлопцы моцныя. І не толькі хлопцы. У мяне яны выклікаюць вельмі сур'ёзную павагу. Вось дзе б МНС ні было, як бы яны сябе не спрабавалі паказаць - яны адны з лепшых, калі не лепшыя", - сказаў Лукашэнка.
Паводле яго слоў, МНС рыхтуецца да таго, каб стаць сілавым блокам - як МУС, Мінабароны, КДБ, Дзяржпагранкамітэт і іншыя.
"Я хілю да таго, што ўсе супрацоўнікі МНС, асабліва пры цяперашнім міністры, хочуць быць сілавым блокам. Сілавікі - мы так іх і лічым. Але для таго каб быць сілавіком, трэба цудоўна валодаць зброяй. Маё распараджэнне было, каб мы вызначылі ў МНС, якую частку мы будзем узбройваць. Хто гэтыя хлопцы і дзяўчынкі, якія там служаць?" - спытаў беларускі лідэр.
Не толькі пажары тушыць
Аляксандр Лукашэнка растлумачыў, што ратавальнікам давядзецца вучыцца валодаць рознай зброяй - пісталетамі, аўтаматамі, кулямётамі, гранатамётамі.
"Ці мы іх будзем узбройваць яшчэ і нейкай тэхнікай? Думаю, так. І гэты актыў будзе, сур'ёзны актыў, і дапамога для нашага войска на выпадак, калі раптам", - заявіў кіраўнік дзяржавы.
У выпадку вайны супрацоўнікі МНС не застануцца ў баку і будуць дапамагаць 65-тысячнаму войску, упэўнены прэзідэнт.
“Не можам мы ў краіне кампактнай, невялікай мець колькасць пастаянна дзейных Узброеных Сіл 200-300 тысяч. Мы дамовіліся, што колькасць нашых Узброеных Сіл, арміі нашай – 65 тысяч. На гэтым спыніліся. Але калі адбудзецца нейкі канфлікт, не дай бог вайна, у нас што, у МНС моцныя надзейныя супрацоўнікі будуць у баку? Не. Яны не толькі пажар будуць тушыць", - дадаў Лукашэнка.
"Прыбіраць трэба тыя функцыі, якія сябе зжылі і якія нам не патрэбны. Каб людзі на іх не крыўдзіліся, што яны куды трэба і куды не трэба ходзяць, а пажараў менш не стала. І па іншых напрамках", - пракаментаваў беларускі лідэр будучыя рэформы ў МНС.
У інтарэсах МУС і Мінабароны
Як адзначыў пасля нарады ў прэзідэнта міністр па надзвычайных сітуацыях Вадзім Сіняўскі, ведамства даўно вядзе падрыхтоўку складу, які можа быць задзейнічаны ў выпадку масавых беспарадкаў і ваеннай пагрозы.
"У сувязі з гэтым у нас зроблены неабходны разлік сіл са сродкаў, і ў выпадку ўзнікнення тых абставін, аб якіх сказаў кіраўнік дзяржавы, мы будзем гатовы сфарміраваць адпаведны рэзерв у інтарэсах МУС, а на выпадак ваеннай пагрозы - у інтарэсах Мінабароны", - падкрэсліў Сіняўскі.
Чытайце таксама:
Лукашэнка не мае намеру мірыцца з дзеяннямі ўлад Украіны
Літва можа даскакацца – Лукашэнка
Лукашэнка адказаў, на чыім баку Беларусь будзе ў выпадку вайны РФ і Украіны
