Дзяржаўнік і дыпламат: якім быў жыццёвы шлях Уладзіміра Макея
18:37 26.11.2022 (абноўлена: 10:39 29.11.2022)
© Sputnik / Виктор Толочко
Падпісацца
Аб тым, што на 65-м годзе жыцця памёр кіраўнік беларускага знешнепалітычнага ведамства Уладзімір Макей, стала вядома ў суботу.
Уладзімір Макей нарадзіўся ў Гродзенскай вобласці ў вёсцы Некрашэвічы 5 жніўня 1958 года. З самага ранняга дзяцінства быў прывучаны да працы, дапамагаў бацькам з хатнімі справамі.
Школу будучы дзяржаўны дзеяч скончыў з залатым медалём і паступіў у Мінскі педінстытут замежных моў (цяпер МДЛУ – Sputnik), з якога выпусціўся ў 1980-м.
Ад арміі да міністэрства
Праходзіў службу ва Узброеных Сілах СССР з 1980-га па 1992 год. Звольніўся ў запас палкоўнікам.
Пасля завяршэння ваеннай службы Уладзімір Макей навучаўся ў Дыпламатычнай акадэміі МЗС Аўстрыі ў 1992-1993 гадах, з’яўляўся (1993-1995 гады) трэцім сакратаром упраўлення інфармацыі і гуманітарнага супрацоўніцтва, другім сакратаром аддзела аналізу і прагназіравання, другім сакратаром сакратарыята МЗС рэспублікі.
Далейшую працу Макей працягнуў у знешнепалітычным ведамстве: намеснік кіраўніка Службы дзяржпратакола, прадстаўляў нашу рэспубліку пры Савеце Еўропы, працаваў у французскім пасольстве дзяржавы і ўзначальваў Упраўленне агульнаеўрапейскага супрацоўніцтва.
Ужо ў 2000 годзе прэзідэнт Беларусі Аляксандр Лукашэнка прызначыў Макея сваім памочнікам, на гэтай пасадзе ён прапрацаваў восем гадоў, пасля – узначаліў адміністрацыю прэзідэнта рэспублікі.
На пасаду кіраўніка знешнепалітычнага ведамства прэзідэнт Беларусі прызначыў Макея 20 жніўня 2012 года.
Глыбока адданы прэзідэнту і радзіме
Намеснік старшыні парламенцкай камісіі па міжнародных справах, лідар ЛДПБ Алег Гайдукевіч характарызуе яго як чалавека "глыбока адданага прэзідэнту і Радзіме", які прайшоў вялікі і цяжкі шлях.
"Усе дзесяць гадоў быў няпросты этап, і Уладзімір Макей паспяхова адстойваў інтарэсы нашай краіны па ўсім свеце. Пры ім МЗС - моцная структура", - сказаў Sрutnik Гайдукевіч.
Стратэг і тактык
Беларускі дыпламат, старшыня Пастаяннай камісіі па міжнародных справах у парламенце Андрэй Савіных прызнаўся, што вестка аб смерці Уладзіміра Макея для яго стала шокам.
"Літаральна тыдзень таму мы размаўлялі, размаўлялі аб перспектывах знешнепалітычных кантактаў. Уладзімір Уладзіміравіч быў поўны энергіі. Без усялякага сумнення, гэта вялікая страта і для нас, і для ўсіх, хто ведаў яго асабіста, і для нашай дзяржавы", - сказаў ён Sputnik.
Паводле яго слоў, Макей спалучаў у сабе рэдкія якасці: ён быў уважлівым чалавекам, які вельмі чула ставіўся да навакольных людзей, заўсёды стараўся дапамагчы.
"З іншага боку, гэта быў чалавек са стратэгічным бачаннем знешняй палітыкі. Ён глыбока разумеў усе тэндэнцыі і хітраспляценні сучаснай глабальнай палітычнай сітуацыі і ўмеў знаходзіць тактычныя рашэнні, якія дазвалялі Беларусі праводзіць без якіх-небудзь заган палітыку, накіраваную на абарону нашых інтарэсаў, на ўмацаванне дабрабыту беларусаў", - дадаў Савіных.
Ён падкрэсліў, што смерць Макея стане сур’ёзнай прарэхай у шэрагах знешнепалітычнага ведамства, а маштаб таго, што здарылася, яшчэ трэба будзе ўсвядоміць.
Апошнюю сустрэчу Макей правёў у пятніцу з Апостальскім нунцыем, арцыбіскупам Антэ Йозічам. Суразмоўцы абмяркоўвалі ўзаемадзеянне Ватыкана і Мінска і актуальнае становішча Рымска-каталіцкай царквы ў Беларусі.
У панядзелак Макей павінен быў сустрэцца з расійскім калегам Сяргеем Лаўровым.
Моцны палітык і прафесіянал
Рэдакцыя Sputnik Беларусь выказвае спачуванні родным і блізкім Уладзіміра Макея і падзяляе боль ад незаменнай страты для ўсёй Беларусі. Калектыў рэдакцыі запомніць Уладзіміра Уладзіміравіча як светлага чалавека, моцнага палітыка і прафесіянала.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Чытайце таксама:
Лукашэнка выказаў спачуванні родным і блізкім Уладзіміра Макея
Макей: Саюз Беларусі і РФ - гэта арыенцір для іншых аб'яднанняў
Макей сустрэўся ў Мінску з прадстаўнікамі грамадзянскай супольнасці Літвы
Макей распавёў пра гібрыдную вайну, мігрантаў і дыялог з ЕС
