МІНСК, 5 жні – Sputnik. Праезд па чыгунцы падаражэе ў Беларусі на 5-15%, паведамілі напярэдадні ў прэс-службе Міністэрства антыманапольнага рэгулявання і гандлю.
МАРГ прыняло пастанову №51, якой прадугледжаны новыя цэны на чыгуначныя перавозкі пасажыраў і багажу ва ўнутрырэспубліканскіх зносінах.
"Тарыфы на перавозкі пасажыраў чыгуначным транспартам агульнага карыстання на рэгіянальных і міжрэгіянальных лініях павялічаны ў сярэднім на 5-15% у залежнасці ад віду зносін", - сказалі ў ведамстве.
Павелічэнне кошту праезду па канкрэтным маршруце будзе залежыць ад адлегласці. Напрыклад, квіток на звычайную электрычку з Мінска да Заслаўя падаражэе на 6 капеек, да Маладзечна - на 17, на Stadler да Оршы - на 43, а да Бабруйска - на 35 капеек.
"Рашэнне аб пераглядзе тарыфаў у вышэйзгаданых памерах прынята ў рамках запланаванага павышэння рэгуляваных цэн і тарыфаў у 2021 годзе ("Тарыфны сшытак") у мэтах падтрымання ўзроўню акупнасці перавозак пасажыраў чыгуначным транспартам", - удакладнілі ў МАРГ.
Там таксама адзначылі, што зараз узровень пакрыцця насельніцтвам выдаткаў на перавозкі па чыгунцы вельмі нізкі - не дасягае 14%, а субсідзіравання іх з бюджэту няма.
Пастанова МАРГ уступіць у сілу праз пяць дзён пасля афіцыйнага апублікавання, гэта значыць павышэння цэн можна чакаць ужо на наступным тыдні.
Чытайце таксама:
Цэны на ўсю "малочку" у Беларусі павышаюцца на 5%
Паліва зноў падаражэла ў Беларусі - ужо ў 24-ы раз з пачатку года
Беларускія ВНУ падымаюць плату за навучанне
Чаму ў Беларусі даражэе гародніна і калі цэны пачнуць зніжацца
МАРГ патлумачыў, чаму ў Беларусі так разагналася інфляцыя