Тэзіс аб нейтралітэце прапануецца выключыць з новай Канстытуцыі Беларусі

МІНСК, 11 жні – Sputnik. Праект зменаў у Канстытуцыю будзе дапрацаваны і да 1 верасня ўнесены прэзідэнту Беларусі, заявіў старшыня Канстытуцыйнай камісіі, старшыня Канстытуцыйнага суда Пётр Міклашэвіч.

Кіраўнік камісіі звярнуў увагу на няўзгодненыя заўвагі яго членаў, што гаворыць аб фармальнай незавершанасці працэсу.

Сёння на чарговым пасяджэнні Канстытуцыйная камісія аналізуе ўдакладненні рэдакцыйнага характару распрацаваных змяненняў у Асноўны закон краіны.

Пётр Міклашэвіч таксама распавёў, што камісія прапанавала выключыць з Канстытуцыі Беларусі тэзіс аб нейтралітэце, пры гэтым замацаваўшы, што з яе тэрыторыі не будуць паступаць пагрозы іншай краіне.

"Дадзенае становішча (пра тое, што Беларусь ставіць за мэту зрабіць дзяржаву нейтральнай - Sputnik) у дзеючай Канстытуцыі маецца. Улічваючы рэальную рэчаіснасць, паколькі Рэспубліка Беларусь з'яўляецца членам АДКБ і фактычна ўваходзіць у ваенна-палітычны блок, то трэба прывесці стан Канстытуцыі ў адпаведнасць з аб'ектыўнай рэальнасцю", - сказаў Міклашэвіч журналістам у сераду ў Мінску.

Паводле яго слоў, замест гэтага на канстытуцыйным узроўні прапануецца замацаваць палажэнне аб тым, што з тэрыторыі Рэспублікі Беларусь не будзе ніякіх пагроз іншым краінам. А пры неабходнасці абараняць суверэнітэт і тэрытарыяльную цэласнасць Беларусь будзе выкарыстоўваць калектыўную абарону ў адпаведнасці з міжнароднымі дамовамі.

На разгляд прэзідэнта таксама будуць прадстаўлены пытанні статусу Усебеларускага схода і смяротнага пакарання.

Праект абноўленай Канстытуцыі Беларусі быў абнародаваны ў сярэдзіне ліпеня. У ім, напрыклад, напісана, што прэзідэнтам РБ можа быць абраны грамадзянін рэспублікі па нараджэнні, "не маладзейшы за 40 гадоў (цяпер - не маладзейшы за 35 гадоў - Sputnik)... пастаянна пражывае ў Рэспубліцы Беларусь не менш за 20 гадоў (цяпер - 10 гадоў) непасрэдна перад выбарамі, які не мае і які не меў раней грамадзянства замежнай дзяржавы або віда на жыхарства... на тэрыторыi замежнай дзяржавы".

Удакладняецца, што нельга быць кіраўніком краіны больш за два тэрміны.

У пераліку паўнамоцтваў кіраўніка дзяржавы мяркуецца прапісаць, што ён са згоды парламента прызначае і вызваляе ад пасады прэм'ер-міністра. У праекце адзначана, што паўнамоцтвы абедзвюх палат Нацыянальнага схода могуць быць спынены пры трохразовай адмове ў прызначэнні кіраўніка ўрада.

Прапануецца прыбраць з Канстытуцыі права прэзідэнта адмяняць акты ўрада, выдаваць дэкрэты, а таксама ўзаконіць магчымасць звальнення з пасады прэзідэнта Усебеларускім народным сходам у сувязі са здзяйсненнем дзяржздрады або іншага цяжкага злачынства.

Вышэйшым прадстаўнічым органам народаўладдзя па новай Канстытуцыі будзе прызнаны Усебеларускі народны сход, у які ўвойдуць усе дэпутаты, сенатары, прадстаўнікі мясцовых органаў самакіравання з усіх рэгіёнаў рэспублікі. Структуру плануецца надзяліць функцыямі па выбары стратэгіі развіцця краіны і вырашэнню пытання аб легітымнасці выбрання прэзідэнта.