МУС прызнала экстрэмісцкімі яшчэ адзін Telegram-канал і чат

МІНСК, 21 кас -Sputnik. Міністэрства ўнутраных спраў Беларусі прызнала экстрэмісцкім фарміраваннем удзельнікаў Telegram-канала "Кібер-Партызаны" і чата "Кібер-слівы", паведаміла МУС.

Там растлумачылі, што ў адпаведнасці з абноўленым заканадаўствам, якое было прынята ў Беларусі пасля пратэстаў у жніўні 2020 года, дзеянні стваральнікаў, кіраўнікоў дадзенага экстрэмісцкага фарміравання, а таксама яго ўдзельнікаў утвараюць склад злачынства, прадугледжанага ст.361-1 "Стварэнне экстрэмісцкага фарміравання або ўдзел у ім".

Падпіска на названыя рэсурсы з'яўляецца падставай для правядзення следчых дзеянняў, у тым ліку ператрусу, а таксама дачы прававой ацэнкі кожнаму падпісанту, сказалі ў МУС.

За апошні год у Беларусі судамі былі прызнаны экстрэмісцкімі больш за 340 Тelegram-каналаў і чатаў, дзейнасць іх была забаронена. Дакументы ў суды падалі МУС і пракуратура.

На мінулым тыдні МУС прызнала экстрэмісцкім фарміраваннем Telegram-канал "Буслы ляцяць" і чат "Буслы ляцяць chat", папярэдзіўшы аб тым, што падпіска і актыўны ўдзел у ім цягнуць крымінальную адказнасць.

У Беларусі 12-кастрычніка 2021 года прынята пастанова Савета міністраў №575 "Аб мерах процідзеяння экстрэмізму і рэабілітацыі нацызму".

Дакумент рэгламентуе парадак прызнання груп грамадзян, якія ажыццяўляюць экстрэмісцкую дзейнасць, у тым ліку з выкарыстаннем мэсенджараў і сацсетак, экстрэмісцкімі фарміраваннямі.

Трэба адрозніваць паказаную навэлу і існуючы парадак прызнання інфармацыйнай прадукцыі экстрэмісцкімі матэрыяламі. У апошнім выпадку неабходна рашэнне суда (прадугледжана адміністрацыйная адказнасць), а для прызнання груп грамадзян экстрэмісцкімі фарміраваннямі патрабуецца рашэнне МУС ці КДБ (надыходзіць крымінальная адказнасць).