Суд Еўрасаюза аштрафаваў Польшчу на мільён еўра ў суткі

МІНСК, 27 кас – Sputnik. Суд Еўрапейскага саюза абавязаў Польшчу выплачваць штраф у адзін мільён еўра ў суткі на карысць Еўракамісіі, пра гэта гаворыцца ў заяве Суда ЕС.

Размова ідзе аб невыкананні раней прынятага судовага рашэння аб спыненні работы дысцыплінарнай палаты для суддзяў.

У ліпені гэтага года Суд Еўрасаюза запатрабаваў ад Польшчы неадкладна спыніць працу дысцыплінарнай палаты Вярхоўнага суда Польшчы. Еўрапалітыкі ўпэўнены, што палата пагражае незалежнасці і бесстароннасці суддзяў. Канстытуцыйны суд Польшчы адмовіўся выконваць рашэнне суда, аднак улады Польшчы вырашылі прыпыніць працу дысцыплінарнай палаты КС у адказ на прэтэнзіі Еўракамісіі.

Пасля гэтага Еўракамісія звярнулася ў Суд ЕС для ўвядзення штрафу ў адносінах да Польшчы.

Гэта не першая дысцыплінарная мера такога кшталту, вылучаная ў адносінах да Польшчы. У верасні гэтага года Суд Еўрасаюза абавязаў Польшчу выплачваць штраф за невыкананне патрабавання аб спыненні працы шахты "Тураў". Штодзень краіна павінна выплачваць паўмільёна еўра.

Пакуль Польшча гэтае рашэнне не выконвае, і Еўракамісія ў выпадку адсутнасці далейшых крокаў можа прыняць супраць Варшавы іншыя меры.

Канстытуцыйны суд Польшчы раней пацвердзіў перавагу канстытуцыі краіны над заканадаўствам Еўрасаюза на фоне адразу некалькіх вердыктаў Суда ЕС, які асудзіў дзеянні ўлад рэспублікі. Кіраўнік Еўракамісіі Урсула фон дэр Ляйен у якасці крокаў у адказ ужо агучыла магчымасць пазбаўлення доступу Варшавы да фінансавання з боку Еўрасаюза.