Прышчэпкі, рэйс у Багдад і Марадона: 11-ы дзень мігрантаў на мяжы

МІНСК, 18 ліс — Sputnik. Пераважная колькасць мігрантаў, якія больш за 10 дзён правялі ў стыхійным лагеры каля беларуска-польскай граніцы, перамясцілася ў лагістычны цэнтр. Паводле ацэнак беларускіх прадстаўнікоў, якія працуюць з мігрантамі, у ТЛЦ ужо перабралася больш за паўтары тысячы чалавек. Для іх падрыхтаваны новыя пляцоўкі на другім паверсе цэнтра.

Як перадае карэспандэнт Sputnik, у чацвер стыхійны лагер мігрантаў ля пагранпераходу "Брузгі" прыкметна апусцеў, палатак ля калючага дроту ўсё менш. Мігранты, якія перасяліліся пад дах, абжываюць часовы прытулак, а таксама актыўна абмяркоўваюць, што будуць рабіць далей.

У чацвер у першай палове дня з Мінска ў Багдад вылецеў чартарны рэйс, які вывез з Беларусі больш за 400 мігрантаў.

"Боінг 747-446" з’явіўся ў Мінску раніцай у чацвер, адпраўкай людзей на радзіму з Беларусі займаецца пасольства Ірака ў Маскве. Па рашэнні іракскага боку мігрантаў з Мінска на радзіму даставяць бясплатна.

Пасольства Ірана ў Маскве паведаміла, што самалёт зробіць прамежкавую пасадку ў сталіцы Іракскага Курдыстана Эрбіле, а затым вылеціць у Багдад.

Ірак раней прыпыніў палёты ў Мінск з-за крытычнай сітуацыі з мігрантамі, якая склалася на беларуска-польскай мяжы.

Беларускія медыкі ў чацвер пачалі вакцынацыю ад каронавіруснай інфекцыі мігрантаў, якія засяліліся ў гандлёва-лагістычны цэнтр.

Сёння ж зарэгістраваны першы лабараторна пацверджаны выпадак каронавіруснай інфекцыі сярод бежанцаў, 25-гадовы мужчына накіраваны ў бальніцу ў Гродна.

У лагістычным цэнтры паблізу мяжы для мігрантаў арганізавана гарачае харчаванне - на сняданак у чацвер ім прапанавалі чай, хлеб, вараныя яйкі і кукурузныя палачкі. Ваеннаслужачыя прыгатавалі для іх абед. У меню - каша пярловая з ялавічнай тушанкай, малочная прадукцыя і чыстая пітная вада.

Таксама ў чацвер да лагістычнага цэнтра прыгналі аўтакраму з самымі неабходнымі прадуктамі, да якой імгненна выстраілася чарга з мужчын. Самым запатрабаваным таварам сталі цыгарэты. Акрамя гэтага, каб мігранты маглі памяняць валюту і атаварыцца ў аўтакраме, побач з ТЛЦ паставілі пункт абмену грошай.

У бежанцаў з'явілася свая знакамітасць - мігрант з Ірака "Марадона", які адным з апошніх пагадзіўся адысці ад лініі мяжы і пасяліцца ў лагістычным цэнтры.

Бачачы, што яго здымаюць журналісты, ён кажа на камеру, што яго імя Марадона, і працягвае жартаваць, што прыбыў у Беларусь з Аргентыны, з Буэнас-Айраса.

Мужчына не толькі знешне падобны да легенды сусветнага футбола, але і таксама артыстычны і эмацыйны. Ён амаль пасябраваў з беларускімі пагранічнікамі: дапамагае арганізоўваць бежанцаў, якія ідуць па лесе ў лагістычны цэнтр. Сёння апошняя група бежанцаў пакінула лясны палатачны лагер.

Паліцыя Польшчы ў сваю чаргу ў чацвер распаўсюдзіла інфармацыю аб тым, што спынена больш за 500 спроб нелегальных мігрантаў незаконна перасекчы дзяржаўную мяжу з боку Беларусі.

Цяпер на польска-беларускім участку мяжы знаходзяцца каля 2 тысяч чалавек, гэта, пераважна, выхадцы з Сірыі і з Ірака, у прыватнасці, з іракскага Курдыстана.

Раней Мінабароны Польшчы паведамляла, што каля 100 мігрантаў былі затрыманыя ў ноч на чацвер пры спробе перасячы мяжу Польшчы і Беларусі. Мінабароны РП таксама сцвярджае, што спроба перасячэння мяжы мігрантамі адбылася пад кіраўніцтвам беларускіх сілавікоў. Па дадзеных ведамства, супрацоўнікі беларускага спецназу, верагодна, пашкодзілі загароды на мяжы і "прымусілі" мігрантаў кідаць камяні ў польскіх памежнікаў, каб адцягнуць іх.