Другі энергаблок БелАЭС атрымаў ліцэнзію на пачатак фізічнага пуску

МІНСК, 22 сне – Sputnik. Беларускі Дзяржатамнагляд прыняў рашэнне выдаць Беларускай АЭС ліцэнзію на пачатак фізічнага пуску энергаблока №2, паведамілі напярэдадні ў ведамстве.

Дакументы, якія абгрунтоўваюць бяспеку АЭС у Астраўцы на прадмет выдачы ліцэнзіі на пачатак фізічнага пуску энергаблока №2, былі разгледжаны на пасяджэнні Камісіі Дзяржатамнагляду. Па выніках абмеркавання было прынята рашэнне "аб падрыхтоўцы дакументаў для ўнясення адпаведных змяненняў у ліцэнзію ДП "Беларуская АЭС" у галіне выкарыстання атамнай энергіі і крыніц іанізуючага выпраменьвання".

Атамную электрастанцыю ў Астраўцы ўзводзяць па расійскім праекце "ВВЭР-1200", які адпавядае ўсім нормам бяспекі МАГАТЭ. БелАЭС складаецца з двух энергаблокаў, магутнасць кожнага – 1200 МВт.

Фізічны пуск першага энергаблока адбыўся ў жніўні 2020 года, у агульную энергасістэму краіны яго ўключылі ў лістападзе таго ж года. Паводле даных Мінэнерга, з моманту ўключэння першага энергаблока ў аб'яднаную энергасістэму выпрацавана 5,7 млрд кВтг электраэнергіі.

Штодзень першы энергаблок выпрацоўвае каля 28 млн кВтг электраэнергіі, што складае 22% ад агульнага аб'ёму яе вытворчасці ў краіне.

Нагадаем, ядзернае паліва для другога энергаблока было дастаўлена на БелАЭС у красавіку гэтага года. На гэты час гатоўнасць блока №2 БелАЭС – 95%. У адпаведнасці з устаноўленым парадкам другі энергаблок атамнай станцыі, таксама як і першы, узяты пад ахову ўнутранымі войскамі МУС.