Бельгія ўзмацніла абмежаванні з-за "амікрона"

МІНСК, 26 сне – Sputnik. Больш жорсткія меры па барацьбе з каронавірусам уступілі ў сілу ў Бельгіі, прычынай стала распаўсюджванне штама "амікрон".

Улады краіны прынялі рашэнне закрыць кінатэатры, тэатры і канцэртныя залы, на спартыўныя мерапрыемствы забаронены доступ гледачоў. Большая частка калядных кірмашоў, адчыненых да свят, павінны будуць зачыніцца датэрмінова з-за жорсткіх санітарных патрабаванняў.

Аб тым, што новы штам каронавіруса "амікрон" стаў дамінантным у краіне, стала вядома напярэдадні. Паводле прагнозаў, да канца бягучага года на яго будзе прыпадаць больш за 90% выпадкаў захворвання ў краіне.

З-за эпідэміялагічнай сітуацыі школы былі датэрмінова зачынены на вакацыі. Яны адчыняцца 10 студзеня, пры гэтым вучні ва ўзросце больш за шэсць гадоў павінны будуць знаходзіцца ў класах у масках.

Кампаніі, якія маюць магчымасць перавесці супрацоўнікаў на выдаленую працу, павінны будуць гэта зрабіць – сама меней, на чатыры дні ў тыдзень.

Пры гэтым, паводле афіцыйнай статыстыкі, у апошнія дні колькасць заражэнняў зніжалася.

У Бельгіі прайшлі поўны курс вакцынацыі ад каронавіруса 76% усяго насельніцтва, уключаючы дзяцей.

За апошнія дні многія еўрапейскія краіны заявілі аб высокіх узроўнях заражэння каронавірусам, у прыватнасці, штамам "амікрон".

У прыватнасці, улады Брытаніі паведамілі аб рэкордна высокай колькасці выяўленых выпадкаў заражэння на Раство – больш чым 122 тысячы чалавек.

У Германіі выявілі больш за 22 тысячы новых выпадкаў заражэння за апошнія суткі, пры гэтым памерлі 157 пацыентаў.

Дамінуе "амікрон" і ў Партугаліі, аб высокай колькасці заражэнняў таксама паведамілі Францыя і Італія.

Нагадаем, што раней Сусветная арганізацыя аховы здароўя (СААЗ) паведамляла аб тым, што новы штам выяўлены больш як у 100 краінах свету. Як падкрэслілі пры гэтым у арганізацыі "агульная рызыка, звязаная з выклікаючым занепакоенасць "амікрон"-варыянтам, застаецца вельмі высокай".