Шайгу расказаў, калі міратворцы АДКБ канчаткова з'едуць з Казахстана

МІНСК, 11 сту – Sputnik. Міратворчыя сілы АДКБ завершаць сваю місію ў Казахстане пасля поўнай стабілізацыі абстаноўкі ў гэтай краіне, заявіў у аўторак міністр абароны Расіі Сяргей Шайгу.

Цяпер міратворцы з пяці краін - Расіі, Беларусі, Арменіі, Таджыкістана і Кыргызстана - працягваюць ахоўваць аб'екты ваеннай інфраструктуры Казахстана. Поўнае разгортванне сваіх баз кантынгенты завяршылі ў мінулую нядзелю, 9 студзеня.

Па словах расійскага міністра, самалёты ВКС Расіі за трое сутак перакінулі ў Казахстан асабовы склад і тэхніку. Ён падкрэсліў, што гэта стала магчымым дзякуючы вопыту, які расійскія войскі і міратворцы атрымалі ў Сірыі і Нагорным Карабаху.

Пасля масавых сутыкненняў пратэстуючых і марадзёраў з сілавікамі ў Казахстане прэзідэнт гэтай краіны Касым-Жамарт Такаеў звярнуўся па дапамогу ў АДКБ, якая накіравала ў рэспубліку міратворчыя сілы. Генеральны сакратар арганізацыі Станіслаў Зась адзначаў, што агульная колькасць групоўкі калектыўных міратворчых сіл складзе каля 2500 чалавек. Таксама адзначалася, што міратворцы не будуць удзельнічаць у ваенных дзеяннях. Замест гэтага яны будуць ахоўваць стратэгічна важныя аб'екты.

У аўторак, 10 студзеня, прэзідэнт Казахстана заявіў, што асноўная місія міратворчых сіл паспяхова завершана, выводзіць кантынгент з краіны пачнуць праз два дні, усяго на гэта спатрэбіцца не больш за 10 дзён.

На нарадзе Сяргей Шайгу паставіў задачу на гэты год прадоўжыць аснашчэнне расійскай арміі высокадакладнай зброяй, найноўшымі сістэмамі разведкі, навігацыі, сувязі і тэхналогіямі штучнага інтэлекту.

Паводле яго слоў, "падчас баявой вучобы трэба рыхтаваць камандзіраў з нешаблонным мышленнем, здольных прымаць эфектыўныя рашэнні".

Кіраўнік расійскага ведамства заявіў, што трэба ўзмацніць ваеннае і ваенна-тэхнічнае супрацоўніцтва з дзяржавамі ШАС і АДКБ, а таксама ўмацаваць абараназдольнасць Саюзнай дзяржавы Расіі і Беларусі.