Крыптавалюты і іх майнінг хочуць забараніць у Расіі

МІНСК, 20 сту – Sputnik. Цэнтральны банк Расіі прапанаваў забараніць абарот крыптавалют у краіне і іх майнінг, вынікае з даклада рэгулятара.

У дакуменце ЦБ гаворыцца, што мэтазгодна ўвядзенне забароны на арганізацыю выпуску і (або) выпуск, арганізацыю абароту і абмену крыптавалют і ўстанаўленне адказнасці за парушэнне гэтага.

Пры гэтым у банку дадаюць, што трэба распрацаваць механізмы блакіроўкі адпаведных аперацый.

Акрамя таго, неабходна вызначыць арганізацыю, якая будзе займацца рэалізацыяй гэтых мер.

У РФ з мінулага года кампаніям і фізічным асобам нельга выкарыстоўваць лічбавыя валюты для аплаты паслуг і тавараў, але пры гэтым валодаць лічбавымі фінансавымі актывамі можна. Як раней паведамлялі ў ЦБ, аб’ём аперацый расіян з крыптавалютай штогод складае каля 5 мільярдаў долараў.

Увядзенне абмежаванняў для расіян на інвестыцыі і валоданне крыптавалютай не плануецца, заявіла дырэктар дэпартамента фінстабільнасці ЦБ Лізавета Данілава.

Данілава таксама звярнула ўвагу, што ЦБ не збіраецца і не плануе прапанаваць забароны для грамадзян на валоданне лічбавымі валютамі – яны гэта змогуць рабіць у замежных юрысдыкцыях.