Фігурыст Канстанцін Мілюкоў застаўся без медаля Алімпіяды

МІНСК, 10 лют – Sputnik. Беларускі фігурыст Канстанцін Мілюкоў заняў 20-е месца ў мужчынскім адзіночным фігурным катанні па выніках адвольнай праграмы, пра гэта паведамляе прэс-служба НАК.

Сам Мілюкоў прызнаўся, што выканаў адвольную праграму крыху горш, чым кароткую, але ў цэлым, паводле яго слоў, са сваёй задачай справіўся.

"У цэлым ацэньваю сваё выступленне добра. Так, у вольнай былі нейкія касякі, але ў цэлым са сваёй задачай справіўся. Так, перасіліў сябе. У кароткай гэта атрымалася крыху лепш, у вольнай – крыху горш. Але я думаю, агульны ўзровень выглядаў годна, паколькі ўсе сапернікі вельмі моцныя – наймацнейшыя спартсмены ў свеце. Прыемна што на іх фоне выглядалі вельмі добра", - падзяліўся эмоцыямі Мілюкоў пасля выступлення.

Трэнер Канстанціна Мілюкова Алег Васільеў таксама ацаніў катанне свайго фігурыста як вельмі дастойнае. Ён лічыць, што гэта быў яго лепшы пракат за сезон – і ў кароткай, і ў свабоднай праграме.

Агульная колькасць балаў у спартсмена – 222,22.

Фігурыст Канстанцін Мілюкоў раней выступаў за Расію. У Беларусь ён пераехаў у 2019 годзе і стаў першым спартсменам ад рэспублікі на Алімпійскіх гульнях у мужчынскім адзіночным катанні за апошнія 16 гадоў: апошні раз у мужчынскім адзіночным катанні Беларусь на Гульнях была прадстаўлена ў 2006 годзе ў Турыне, калі Сяргей Давыдаў заняў 14-е месца ў кароткай і 16-е месца ў адвольнай праграмах.

На Гульнях у Пекіне 7 лютага Мілюкоў выканаў кароткую праграму: за выступленне пад кампазіцыю з балета "Шчаўкунчык" ён атрымаў 78,49 бала. Палепшыць свае пазіцыі ў адвольнай праграме яму не ўдалося.