Альтэрнатыва Егіпту: тураператар арганізуе чартары з Мінска ў Іарданію

Беларускі тураператар пасля паспяховай чартэрнай праграмы восенню з красавіка зноў запускае турпрадукт з прамымі рэйсамі ў Іарданію.

Карэспандэнт Sputnik Мікалай Міхнавец даведаўся пра цэны і некаторыя падрабязнасці адносна адпачынку ў гэтай краіне. Як правіла, турысты выбіраюць камбінаваную праграму з начлегам у пустыні і экскурсіяй у старажытны горад.

Цяпер трапіць у Іарданію з Мінска можна праз Стамбул і толькі ў Аман – сталіцу краіны. Чартар будзе дастаўляць турыстаў у Акабу – адразу ў турыстычны рэгіён.

Праграма складзена з улікам таго, што самы спрыяльны час для наведвання Іарданіі – вясна і восень.

Усяго запланавана сем рэйсаў (з 2 красавіка да 4 чэрвеня). Затым турыстычная кампанія зробіць перапынак з-за спякоты, якая ахоплівае Іарданію летам, і адновіць палёты восенню.

Як распавяла Sputnik прадстаўнік тураператара Вольга, восенню 2021 года яны выканалі палётную праграму, "самалёты добра запаўняліся", кірунак быў запатрабаваны, і турысты засталіся задаволеныя.

Экскурсійны тур прадугледжвае дзевяць начэй, з якіх пяць прыйдзецца на Чырвонае мора, адзін начлег – у пустыні ў "кабінах" з відам на зоркі, затым у праграме значыцца паездка ў старажытны горад, а астатні час вандроўнікі правядуць на Мёртвым моры.

Самы бюджэтны варыянт на дваіх без харчавання ў зусім простым атэлі на Чырвоным моры будзе каштаваць 1200$ на дваіх (+30$ за ПЦР-тэст па прылёце на чалавека). Экскурсійны тур з гасцініцамі 4*-5* каштуе 2200$, а адпачынак сям’і з маленькім дзіцем пры тых жа ўмовах абыдзецца ў 2850$.

Менеджэр кампаніі распавяла, што ў Іарданіі лепш браць не "ўсё ўключана". Такога сэрвісу як у Турцыі ці Егіпце там няма. Максімум лепш заказваць сняданак-абед-вячэру (і даплачваць за напоі) і толькі на Мёртвым моры. На Чырвоным знайсці кавярні прасцей, таму аптымальны варыянт – "паўпансіён". Начлег у пустыні прадугледжвае вячэру (у бедуінскім стылі) і сняданак: у панарамныя "нумары" турысты прыбываюць у другой палове дня.

Як водзіцца, ва ўмовах пандэміі нельга не ўлічваць умовы ўезду ў краіну.

Ёсць традыцыйны адмоўны ПЦР, зроблены не пазней, чым за 72 гадзіны да прыбыцця (дзецям да 5 гадоў не трэба). Аднак па прылёце ў Іарданію турысты павінны здаць яшчэ адзін тэст, аплаціўшы яго яшчэ да вылету (30$). І наяўнасць прышчэпкі ад каронавіруса не пазбавіць ад неабходнасці праходзіць дадзеную працэдуру.

Па словах прадстаўніка тураператара, улады Іарданіі заяўлялі аб магчымых зменах у правілах уезду, але калі гэта адбудзецца, пакуль невядома.