Нават не Гандурас: дзе знаходзіцца Беларусь у сусветным рэйтынгу шчасця

МІНСК, 19 сак - Sputnik. Беларусь у сусветным рэйтынгу шчасця World Happiness Report узнялася на 65-е месца, абноўлены даклад апублікаваны на сайце арганізацыі ў пятніцу. За апошнія два гады беларусы сталі больш шчаслівымі, паколькі ў 2021 і 2020 гадах краіна знаходзілася на 75-м радку рэйтынгу.

Індэкс шчасця склаў 5,821 пункты з 10. Аднак ёсць адно "але", адзначаюць аўтары даклада: беларусы з 2020 года не ўдзельнічалі ў апытанні арганізацыі, і цяперашнія значэнні заснаваны на звестках 2019 года.

Самы высокі радок, на якім знаходзілася калі-небудзь Беларусь, - 59-ы.

З постсавецкіх краін лепшыя паказчыкі ў Літвы і Эстоніі - 34-е і 36-е месцы адпаведна. Казахстан размясціўся на 40-й пазіцыі, следам ідзе Латвія - яна на 42-й. Узбекістан заняў у новым рэйтынгу 53-е месца, Малдова (дарэчы, адна з самых бедных краін у Еўропе) абышла Беларусь і знаходзіцца на 62-м радку, Кыргызстан - на 64-м.

Пасля Беларусі ў рэйтынгу размясціўся Туркменістан - на 78-м месцы, Расія сёлета заняла 80-е месца, хаця летась была на 76-м. Арменія - на 82-ім, Таджыкістан - на 83, Азербайджан - 92-і, Украіна - 98-я, Грузія - 105-я.

Шчаслівей за беларусаў жывуць таксама грамадзяне Нікарагуа (45) і Гандураса (55). Самай жа шчаслівай дзяржавай на планеце пяты раз запар становіцца Фінляндыя. У дзясятку самых шчаслівых таксама патрапіла большасць еўрапейскіх краін: Данія, Ісландыя, Швейцарыя, Нідэрланды, Люксембург, Швецыя, Нарвегія, Ізраіль і Новая Зеландыя.

Самымі нешчаслівымі краінамі на думку ААН сталі Афганістан (як і ў мінулым годзе). Перад ім знаходзяцца Ліван, Зімбабвэ, Руанда, Батсвана і Лесота.

Нагадаем, даклад World Happiness Report складаецца штогод падраздзяленнем ААН па пошуку рашэнняў стабільнага развіцця. У ім ацэньваюцца 146 краін свету і ўлічваюцца такія паказчыкі, як чаканая працягласць жыцця, сацыяльная падтрымка, карупцыя і іншыя. Упершыню сусветны даклад аб шчасці быў выпушчаны ў 2012 годзе.