Да 470%: МАРГ выявіў парушэнне цэн на школьныя тавары

МІНСК, 29 жні – Sputnik. Спецыялісты міністэрства антыманапольнага рэгулявання і гандлю праверылі 137 аб’ектаў, якія гандлююць таварамі для школ, у 32 з іх выяўлены сур’ёзныя цэнавыя парушэнні, расказалі ў прэс-службе МАРГ.

Неабгрунтаваныя гандлёвыя надбаўкі былі ўстаноўлены на рукзакі, партфелі і ранцы – да 470%, абутак для дзяўчынак – да 207%. Акрамя таго, у некаторых аб’ектах прадаваліся пінжакі, штаны і кашулі для хлопчыкаў з нацэнкай у 83%, а блузкі і спадніцы для дзяўчынак – да 68%.

Былі завышаны цэны і на панчошна-шкарпэткавыя вырабы для дзяцей і абутак – да 68,8%. Нагадаем, па заканадаўстве максімальная надбаўка не можа быць большай за 30%.

У МАРГ адзначылі, што за высокія надбаўкі фізасоба абавязана заплаціць штраф да 20 базавых велічынь (640 рублёў), калі прадаваў іпэшнік або юрыдычная асоба, штраф будзе ў двухразовым памеры ад сумы завышэння цаны. У цэлым жа ў міністэрстве падкрэсліваюць, што большасць гандлёвых аб’ектаў выконваюць закон і выконваюць патрабаванні аб узроўні надбавак.

Федэрацыя прафсаюзаў у жніўні правяла маніторынг і адзначыла, што сёння дзіця ў школу сабраць даражэй, чым у мінулым годзе – прыкладна на 10%.

А яшчэ прафсаюзы, зазірнуўшы ў крамы, прыйшлі да высновы, што ў рэальнасці школьныя зборы абыйдуцца куды даражэй, чым раней агучвалі ўлады. Толькі на канцылярыю трэба патраціць ад 160 да 230 рублёў у залежнасці ад рэгіёна.

На адзенне і абутак да школы бацькам давядзецца раскашэліцца. Напрыклад, танней за ўсё збіраць дзяцей на Гродзеншчыне (на хлопчыка – 611 рублёў, на дзяўчынку – 498 рублёў). Даражэй за ўсё сабраць малодшакласніка ў Мінскай вобласці (778 рублёў), дзяўчынку – у Магілёўскай (634 рублі).

На старшакласнікаў – яшчэ больш. У Гродзенскай вобласці зборы дзяўчынак абыдуцца прыкладна ў 698 рублёў, хлопчыкаў – 730 рублёў. У сталіцы даражэй за ўсё – 905 рублёў на хлопчыка.

У выніку на зборы дзіцяці ў школу давядзецца аддаць не менш за адну тысячу рублёў.