Усе 10 фігурантаў справы экстрэмісцкага "Руху" віну ў судзе не прызналі

МІНСК, 10 ліс – Sputnik. Гомельскі абласны суд другі дзень разглядае крымінальную справу ў дачыненні да ўдзельнікаў "Рабочага Руху" (прызнаны ў Беларусі экстрэмісцкім), учора пракуроры аб’явілі абвінавачанне дзесяці фігурантам.

Сёння абвінавачаным было дадзена права выказаць сваё стаўленне да прад’яўленага абвінавачання. Усе фігуранты заявілі суду, што сваю віну ў здрадзе дзяржаве, а таксама стварэнні і ўдзеле ў экстрэмісцкім фарміраванні не прызнаюць, перадае карэспандэнт Sputnik. Толькі адзін з абвінавачаных Андрэй Пагерыла прызнаў віну па арт.188 (Паклёп) КК Беларусі.

Пасля таго як абвінавачаныя выказалі сваё стаўленне да абвінавачання, суд пачаў даследаваць матэрыялы крымінальнай справы – трэба прачытаць 38 тамоў. Да 2 снежня распісаны план судовых пасяджэнняў, даты заканчэння судовага следства і пачатку спрэчак бакоў пакуль няма.

Судовыя слуханні па рэзананснай справе, якую расследаваў КДБ, пачаліся ў мінулую сераду ў Гомельскім абласным судзе, яны праходзяць у адкрытым рэжыме. Дзяржабвінавачанне падтрымліваюць два пракуроры. У першы дзень на суд прыехалі сваякі абвінавачаных, у тым ліку з іншых гарадоў.

Усе абвінавачаныя знаходзяцца пад вартай. Іх абвінавачваюць у здрадзе дзяржаве, а таксама стварэнні экстрэмісцкага фарміравання і ўдзеле ў ім.

У абвінавачанні, якое абвяшчаецца ў судзе, гаворыцца, што абвінавачаныя абмяркоўвалі планы блакіроўкі шэрага буйных прадпрыемстваў краіны (у тым ліку Гродна-Азот, БМЗ), актыўна ўзаемадзейнічалі з экстрэмісцкай структурай, якую стварылі збеглыя сілавікі ("Байпол"), штабам Ціханоўскай і заходнімі спецслужбамі.

Санкцыі крымінальных артыкулаў, па якіх судзяць "рухаўцаў", прадугледжваюць да 15 гадоў пазбаўлення волі.