У Беларусі ўпершыню будуць рыхтаваць дзяржаўных аўдытараў

МІНСК, 4 сак – Sputnik. Спецыялістаў па аўдыце будуць рыхтаваць на эканамічным факультэце БДУ, паведамляе прэс-служба Белдзяржуніверсітэта.

Спецыяльнасць будзе называцца "Дзяржаўны аўдыт", рыхтаваць спецыялістаў па ёй будуць упершыню ў Беларусі. Выпускнікам прысвояць кваліфікацыю "Эканаміст. Спецыяліст па аўдыце".

Па словах дэкана эканамічнага факультэта Ганны Каралёвай, падрыхтоўка аўдытараў найперш будзе сфакусіравана на фінансава-эканамічнай дзейнасці дзяржустаноў, а не бухуліку, як было да гэтага.

Прадугледжваецца, што навыкі новых спецыялістаў будуць запатрабаваны ў сферы экспертна-аналітычнай, кантрольнай і аўдытарскай дзейнасці, дадуць магчымасць ім працаваць у фінансавых, кантрольных, праваахоўных органах, а таксама ў сферы бізнес-аўдыту і кансалтынгу.

Вучэбная праграма будзе ўключаць наступныя дысцыпліны: "Дзяржаўны бюджэт", "Фінансы", "Падаткі і падаткаабкладанне", "Бухгалтарскі ўлік і аўдыт", "Міжнародныя стандарты фінансавай справаздачнасці", "Кіраўніцкі ўлік", "Процідзеянне карупцыі" і гэтак далей.

У новых для айчыннай эканомікі спецыялістах зацікаўлены многія арганізацыі. Па іх меркаванні, такія кадры жыццёва неабходны ў вобласці дзяржаўнага аўдыту.

Большая частка тых, хто паступіў – да 60% з ліку абітурыентаў, якія пададуць дакументы на гэтую спецыяльнасць – будзе навучацца бясплатна, паколькі гэта будуць мэтавыя месцы.

Беларускі дзяржаўны ўніверсітэт адкрые ў 2023 годзе яшчэ адну новую спецыяльнасць – "Кібербяспека". Навучанне будзе весціся на двух факультэтах – факультэце радыёфізікі і камп’ютарных тэхналогій, а таксама факультэце прыкладной матэматыкі і інфарматыкі.

Што датычыцца колькасці месцаў, конкурсу і мінімальнага прахаднога бала, гэтыя падрабязнасці для новых спецыяльнасцей стануць вядомы пазней.