Грызлоў: у Беларусі можа з’явіцца больш філіялаў расійскіх ВНУ

МІНСК, 25 кас – Sputnik. Урад Расіі выдзеліў у гэтым годзе квоту ў 1 300 месцаў для беларускіх студэнтаў на бясплатнае навучанне ў ВНУ, сказаў пасол Расіі Барыс Грызлоў перад пачаткам форуму інжынерна-тэхналагічных ВНУ Саюзнай дзяржавы, перадае карэспандэнт Sputnik.

Паводле слоў пасла, гэта вельмі важнае рашэнне, якое мае стратэгічную лінію, у тым ліку – ажыццяўленне роўных праў на атрыманне належнай адукацыі.

Грызлоў нагадаў, што Расія дае магчымасць беларускім студэнтам вучыцца бясплатна па ўрадавай квоце. У бягучым годзе яна складала 1 300 месцаў. Таксама вучацца і расіяне ў беларускіх ВНУ.

Пасол выказаў пажаданне, каб у Беларусі было больш філіялаў расійскіх ВНУ.

Грызлоў расказаў, што сярод беларускіх абітурыентаў карыстаецца папулярнасцю Санкт-Пецярбургскі політэхнічны ўніверсітэт, а таксама Інстытут дакладнай механікі і оптыкі.

Ён нагадаў, што ў Беларусі створана атамная галіна, а ў Расіі ёсць інстытут "МИФИ ", які рыхтуе спецыялістаў у ядзернай сферы.

На дадзены момант у Мінску ёсць два філіялы расійскіх ВНУ – РДСУ і РЭУ імя Пляханава.

У сацыяльным універсітэце (РДСУ) рыхтуюць юрыстаў, менеджараў, спецыялістаў у галіне сацыяльнага абслугоўвання, псіхолагаў і нават канфліктолагаў.

У "Пляханаўцы" некалькі напрамкаў: эканоміка, менеджмент, гандлёвая справа, таваразнаўства, тэхналогіі і арганізацыя грамадскага харчавання, юрыспрудэнцыя, сацыялогія і інфарматыка.

Акрамя філіялаў, у Магілёве працуе Беларуска-расійскі ўніверсітэт, дзе студэнты з дзвюх краін могуць атрымаць падвойны дыплом – беларускага і расійскага ўзору. Рыхтуюць там машынабудаўнікоў, электратэхнікаў, інжынераў і эканамістаў.