Памёр народны артыст СССР Юрый Саломін

МІНСК, 11 сту – Sputnik. Народны артыст СССР Юры Саломін памёр у сне, паведамляе RT са спасылкай на ўнучку.

Толькі ў аўторак яго выпісалі з бальніцы.

Нагадаем, Саломін быў шпіталізаваны з інсультам 6 лістапада мінулага года. Праз два тыдні паведамлялася, што 88-гадовага акцёра перавялі з рэанімацыі ў звычайную палату ў аддзяленні неўралогіі.

Нарадзіўся 18 чэрвеня 1935 года ў горадзе Чыта Усходне-Сібірскага краю ў сям’і музычных педагогаў. Скончыўшы школу, паступіў у Вышэйшае тэатральнае вучылішча імя М. С. Шчэпкіна пры Малым тэатры – яго залічылі ў клас народнай артысткі СССР Веры Пашэннай. З гэтым тэатрам была звязана і ўся яго далейшая творчая біяграфія: у 1957 годзе яго прынялі ў трупу, з 1988-га ён стаў мастацкім кіраўніком Малога тэатра. Сыграў мноства роляў, сам паставіў 11 спектакляў.

Кінематограф не застаўся абыякавым да таленту Саломіна: у 1960-м ён дэбютаваў у карціне "Бессонная ночь". А ўсесаюзная слава да яго прыйшла пасля выхаду на экраны карціны "Адъютант его превосходительства".

У пачатку 1970-х зняўся ў фільме Акіра Курасавы "Дерсу Узала" – гэта першы фільм рэжысёра не на японскай мове і ў той жа час адзіны, зняты ім на шырокафарматнай кінастужцы 70 мм. Гэта карціна атрымала залаты прыз на IX Маскоўскім кінафестывалі і "Оскара" за лепшы замежны фільм.

Усяго на рахунку Юрыя Саломіна больш за 50 работ у кіно – не лічачы дакументальных фільмаў.

У гонар Юрыя Саломіна названы астэроід №10054.