Зарплаты, падаткі, камуналка і шмат іншага: што зменіцца з 1 студзеня?

CC0 / Pixabay/Tyca / Навагодняя ёлка
Навагодняя ёлка - Sputnik Беларусь, 1920, 30.12.2021
Падпісацца на
Столькі змен, як з 1 студзеня, беларусы не адчуваюць за ўсе 12 месяцаў. З новага 2022 года чакаецца чарговая хваля навін – і мы зможам адчуць іх на сабе.
У Беларусі нарэшце завершыцца пенсійная рэформа: мужчыны будуць выходзіць на заслужаны адпачынак у 63 гады, жанчыны – у 58 гадоў. Павялічацца ў наступным годзе і пенсіі – амаль на 30 долараў.
Таксама з 1 студзеня ў беларускіх крамах стане на парадак менш тавараў заходніх краін. З-за санкцый Еўропы і Амерыкі ўлады Беларусі ўвялі забарону на ўвоз 18 прадуктовых пазіцый – мяса, агародніны, садавіны, арэхаў, сыроў і іншага.
Пра тое, што месяц новы нам нясе, чытайце ў традыцыйнай падборцы Sputnik.

Жыроўкі "пацяжэюць"

Пачнём з самага непрыемнага. З 1 студзеня, як гэта апошнія гады бывае, павысяцца тарыфы на жыллёва-камунальныя паслугі. Падаражэюць вада (халодная і гарачая), капрамонт, уборка ў падвалах, абслугоўванне ліфтаў і вываз смецця – на 11 рублёў 10 капеек. У сваіх жыроўках гэтае падаражанне жыхары шматкватэрных дамоў заўважаць толькі ў лютым.
У наступным годзе "камуналка", як і заўсёды, будзе паднімацца двойчы: пасля студзеньскіх зменаў цэны на ЖКП павялічаць з 1 чэрвеня. Па планах улад, на 3 рублі 4 капейкі павінны падаражэць ацяпленне, газ і святло.

З'явіцца падатак на кватэру

З 1 студзеня з'явіцца падатак на кватэру для фізічных асоб. Яго павінны будуць плаціць уладальнікі жылых памяшканняў у шматкватэрных або блакіраваных дамах. Цяпер такі падатак выплачваюць уласнікі двух і больш кватэр, а з новага года – усе без выключэння.
Сума будзе налічвацца, зыходзячы з агульнай плошчы жылля, падатковая стаўка складзе 0,1%. Так, гадавы падатак на стандартную 60-метровую кватэру ў райцэнтрах складзе 27 рублёў, а ў Мінску – 48,6 рубля.
Налічацца падатак будзе штогод, першы раз яго давядзецца аплаціць не пазней за 15 лістапада 2022-га (аванс), астатнюю частку – да 15 лістапада 2023-га. Ад выплаты вызваляць пенсіянераў, інвалідаў І і ІІ групы, членаў шматдзетных сямей, салдат тэрміновай службы і праходзячых альтэрнатыўную службу, удзельнікаў ВАВ, а таксама недзеяздольных грамадзян.

Павялічаць і іншыя падаткі

Напрыклад, рамесны збор і падатак на аграэкатурызм. З 2022 года стаўку для рамеснікаў адвяжуць ад базавай велічыні і ўстановяць канкрэтную суму – 62 рублі ў год. У залежнасці ад інфляцыі яе будуць індэксаваць. Цяпер тыя, хто займаецца рамеснай дзейнасцю (майструе з дрэва, шкла, металу, лепіць з гліны, шые і гэтак далей), плацяць дзве базавыя велічыні – 58 рублёў. Так што, па сутнасці, павышэнне нязначнае.
А вось збор для аграэкатурызму скароцяць практычна ў два разы. Цяпер ён складае 58 рублёў за кожную сядзібу, з 1 студзеня - 31 рубель. Раней дэпутаты Палаты прадстаўнікоў заяўлялі аб планах узняць падаткі для аграбізнесу да 4 базавых.

Павышэнне пенсіённага ўзросту

Пенсіённы ўзрост у Беларусі зменіцца з 1 студзеня - гэта апошняе яго павелічэнне і канец пенсійнай рэформы, якая доўжылася з 2016 года. З наступнага года мужчыны будуць выходзіць на пенсію ў 63 гады, жанчыны – у 58 гадоў. Паралельна павялічваецца і тэрмін страхавога стажу (самы галоўны паказчык, пры якім вам будуць налічваць пенсіі) – да 18 гадоў і 6 месяцаў. Калі вы афіцыйна адпрацавалі такі перыяд, вы зможаце атрымліваць грошы ад ФСАН.
Дарэчы, памер пенсій па планах улад у 2022 годзе таксама зменіцца. Цяпер сярэдняя па ўзросце роўная 512 рублям (203 долары), а на працягу наступнага года яна вырасце да 581 рубля (231 долар).

Без хамона і пармезану?

Улады Беларусі з 1 студзеня ўводзяць забарону на ўвоз у краіну некаторых прадуктаў заходняй вытворчасці. Харчовае эмбарга закране 18 відаў тавараў – у іх ліку ялавічына, свініна, курыца і іншае мяса, харчовая мука, малако і малочная прадукцыя, агародніна, садавіна, арэхі, кандытарскія вырабы, соль, каўбасы і іншая "вэнджанка". З крам прыбяруць тавары, якія, як абвяшчае афіцыйная фармуліроўка ўлад, вырабленыя ў краінах, што "рэалізуюць дыскрымінацыйную палітыку і ажыццяўляюць недружалюбныя дзеянні ў адносінах да Беларусі".
Забарона на ўвоз датычыцца прадуктаў з ЕС, ЗША, Канады, Нарвегіі, Албаніі, Ісландыі, Паўночнай Македоніі, Вялікабрытаніі, Чарнагорыі, Швейцарыі.

"Згараць" старыя грошы

Заўтра ў беларусаў апошні дзень, каб абмяняць беларускія рублі ўзору 2000 года. Ужо з 1 студзеня 2022 года банкноты наміналам 100, 500, 1 000, 5 000, 10 000, 20 000, 50 000, 100 000 і 200 000 беларускіх рублёў ператворацца ў звычайныя паперкі. Каб гэтага не здарылася, можна зазірнуць у касы Нацбанка на Талстога, 6 у Мінску і памяняць іх на новыя купюры. Нагадаем, пасля дэнамінацыі 2016 года ў краіне замест "тысяч" і "мільёнаў" з'явіліся капейкі і рублі.

Вырастуць заробкі бюджэтнікаў

Базавая стаўка, якая ўплывае на бюджэт пражытачнага мінімуму, дзіцячую дапамогу і заробкі работнікаў бюджэтнай сферы, павялічыцца з 198 да 207 рублёў. Змяненні адбудуцца з 1 студзеня. Памеры дапамогі і БПМ пералічаць 1 лютага 2022-га, а педагогі, медыкі, праваахоўнікі, работнікі сацсферы атрымаюць даплаты. Вырасце таксама памер аднаразовай выплаты на аздараўленне настаўнікам – замест паловы аклада будзе цэлы.
Сярод бюджэтнікаў самая высокая зарплата цяпер у медработнікаў – каля 1425 рублёў. Настаўнікі ў сярэднім зарабляюць 1176 рублёў, выхавальнікі – 917 рублёў. Што тычыцца сацработнікаў, яны зараз атрымліваюць менш за ўсіх – 800 рублёў.

Падрасце і "мінімалка"

Зарплата, ніжэй за якую дзяржструктуры і кампаніі не маюць права ўстанаўліваць сваім работнікам, з 1 студзеня складзе 457 рублёў. Цяпер яе памер – 400 рублёў. "Мінімалку" ўлады пералічваюць толькі раз на год.

Новыя магчымасці сямейнага капіталу

Грошы, якія налічваюцца шматдзетным сем'ям, у якіх нарадзілася або дзе ўсынавілі/удачарылі трэцяе або наступнае дзіця, можна будзе траціць не толькі на куплю жылля, але і на адукацыю, а таксама лячэнне. Зрабіць так распарадзіўся прэзідэнт Аляксандр Лукашэнка. Пачынаючы з 1 студзеня, належныя ад дзяржавы сродкі – а гэта 23 737 рублёў (9 442 долараў) – можна будзе выкарыстоўваць на працягу двух гадоў.

"Белтэлекам" і новыя тарыфы

Нацыянальны аператар сувязі некалькі разоў сёлета анансаваў павелічэнне тарыфаў на інтэрнэт і сувязь і столькі ж разоў пераносіў яго. У выніку кошт паслуг вырасце з 1 студзеня: інтэрнэт – на 4%, сувязь – на 5%.
Мабільныя аператары А1 і МТС паспелі падняць цэны да Новага года.

Праца паліклінік і бальніц

На найбліжэйшыя навагоднія і калядныя святы зменіцца графік працы паліклінік і бальніц. На Новы год, 1, 2 і 7 студзеня медустановы будуць працаваць па графіку святочнага дня, 9 студзеня – выхаднога дня, а 8 студзеня – па графіку работы ў суботні дзень.

Транспарт пойдзе па-іншаму

У навагоднюю раніцу 1 студзеня крыху зменіцца праца грамадскага транспарту ў Мінску. Напрыклад, з 6 раніцы да 14 дня не будуць хадзіць тралейбусы №№ 12, 30, 47, 51 і 60; аўтобусы №№ 51, 60, 71 і 96; трамвай №4. З 8 і да 11 раніцы адмяняецца работа аўтобуснага маршруту №119С. Таксама ўвесь дзень не будзе хадзіць маршрутка №1312 ад аўтастанцыі "Аўтазаводская" да пасёлка Сокал і аўтобусы №№ 66, 94С, 76э, 83э, 114С, 151э.
Метро ў навагоднюю ноч будзе працаваць да 4 раніцы. Пры гэтым пачне працу падземка ў першы дзень 2022 як звычайна – у 05:30. Таксама на навагоднія святы з Мінска ў рэгіёны будзе курсіраваць больш дадатковых цягнікоў.
Прадукты ў краме - Sputnik Беларусь, 1920, 30.12.2021
Дзяржава будзе кантраляваць цэны на "сацыяльныя" тавары яшчэ тры месяцы
Чытайце таксама:
Камунальныя паслугі падаражэюць у Беларусі
Дарагі "другі хлеб": чаму бульба ў Беларусі стала залатой
Што будзе з беларускім рублём і эканомікай у 2022-м – прагноз ЕАБР
Стужка навiн
0
Спачатку новыяСпачатку старыя
loader
У эфіры
Заголовок открываемого материала