Фестываль "У Пласток на квасок" - свята народнай кухні" адбыўся 13 ліпеня ў вёсцы Пласток Любанскага раёна Мінскай вобласці. Ён прайшоў упершыню, але адразу набыў міжнародны статус – на свяце ежы і напояў прысутнічалі госці з Літвы і Расіі.
Арганізавалі свята самі мясцовыя жыхары, зацікаўленыя ў развіцці сваёй вёскі, пад кіраўніцтвам Сяргея Выскваркі - этнахарэографа, кіраўніка фальклорнага ансамбля "Верабейкі" з Любані.
Свята пачалося з прагулкі і знаёмства з сучаснай вёскай, з жыхарамі, з падвор'ямі і з беларускай гасціннасцю, часам нечакана багатай. Пакуль удзельнікі размаўлялі з мясцовымі жыхарамі, чатыры найстарэйшыя захавальніцы мясцовых кулінарных традыцый падрыхтавалі дэгустацыю-конкурс мясцовага прадукту "Квас з прыкрасамі".
Ён уяўляе сабой адметны для дадзенай мясцовасці грыбны суп. Ён гатуецца на капусным расоле з дадаткам пярлоўкі і сушаных грыбоў у печы. Хтосьці дадае ў яго і крыху квашанай капусты, хтосьці - мяса, хтосьці - рыбы або пакідае посным. Густ атрымліваецца своеасаблівы - рэзкавата-кіслы.
На вялікіх сталах чатыры гаспадыні Раіса Кагадоўская, Ніна Маладзянава, Галіна Булавенка і Соф'я Каток падрыхтавалі чатыры чыгуны "квасу" кожная па сваім рэцэпце. Пераможцу ў выніку так і не абралі - узнагародзілі ўсіх.
Пасля сняданку адбыліся выступы фальклорных калектываў з суседняй вёскі Камуна "Чуткі", мясцовага калектыва "Беражніца", ансамбля "Гуда" з Мінска і гарманіста Ігара Узлова з Масквы.
Жадаючыя танцавалі народныя танцы, спявалі да раніцы, а начаваць разышліся па вясковых хатах і адрынах.
Як адзначалі свята народнай кухні, а заадно – дзень нараджэння фотакарэспандэнта Sputnik Альфрэда Мікуса, глядзіце ў яго фотастужцы і далучайцеся да віншаванняў!
Чытайце таксама:
- Для сапраўдных ласуноў: беларускія народныя стравы з ягад
- Пачастунак для Русалкі і земляны снядак: гатуем сыр па беларускіх рэцэптах
- Не толькі дранікі: самыя смачныя стравы беларускай кухні
- Не толькі з ягад: незвычайныя рэцэпты варэння
- Вугор у віне і катлеты з селядца: незвычайныя рэцэпты з рыбай