МІНСК, 19 ліп – Sputnik. Авіязносіны Мінска з яшчэ адным эміратам ААЭ – Рас-эль-Хайма – плануецца наладзіць у верасні-кастрычніку бягучага года, расказалі ў Рэспубліканскім саюзе турыстычных арганізацый (РСТА).
Гатоўнасць наладзіць новы авіямаршрут пацвердзіў выканаўчы дырэктар дэпартамента турызму і MICE ўрада эмірата Рас-эль-Хайма Іад Расбэй, які знаходзіўся з візітам у Беларусі. Па планах, першы рэйс будзе арганізаваны "Белавія" ў канцы верасня - пачатку кастрычніка. Спярша плануецца лятаць у Рас-эль-Хайму адзін ці два разы на тыдзень, падкрэслілі ў РСТА.
Рас-эль-Хайма - самы паўночны эмірат ААЭ, у гэтым рэгіёне знаходзяцца Хаджарскія горы і найчысцейшае мора са спадзістымі белымі пясчанымі пляжамі. Эмірат знаходзіцца ў гадзіне язды ад Дубая.
Нагадаем, што лятаць у Дубай "Белавія" пачала ў лютым 2021 года. Рэгулярныя рэйсы выконваюцца па аўторках, пятніцах і нядзелях, купіць квіткі на самалёт можна ад 255 долараў. Акрамя таго, у Мінск з Дубая лятае Flydubai.
Паміж Беларуссю і ААЭ з 16 студзеня гэтага года дзейнічае бязвіз: з беларускім пашпартам можна знаходзіцца ў Эміратах да 90 дзён з даты ўезду. Пры ўездзе ў краіну трэба прад'явіць адмоўны вынік ПЦР-тэста, зробленага не раней, чым за 72 гадзіны да прыбыцця. Сертыфікат павінен быць на арабскай або англійскай мове. Знаходзіцца ў хатняй самаізаляцыі тым, хто вяртаецца ў Беларусь пасля адпачынку ў Аб'яднаных Арабскіх Эміратах, не трэба.
Нагадаем таксама, што беларускі ўрад адмяніў абавязковы каранцін для вакцынаваных ад COVID-19 і скарачае тэрмін самаізаляцыі па каронавірусе з дзесяці да сямі дзён для тых, хто не прышчэплены.
Чытайце таксама:
"Белавія" скараціла да мінімуму колькасць рэйсаў у Ізраіль
Беларусь і Казахстан павялічаць колькасць авіярэйсаў паміж краінамі
Новы рэйс расійскай авіякампаніі звяжа Мінеральныя Воды і Мінск