Беларускі спецназ прыме ўдзел у вучэннях АДКБ "Кобальт-2021"

МІНСК, 17 ліс – Sputnik. Сумесныя вучэнні фарміраванняў спецназа, органаў унутраных спраў, дзяржбяспекі, ратавальнікаў калектыўных сіл аператыўнага рэагавання (КСАР) АДКБ пачынаюцца ў Таджыкістане, паведамілі ў прэс-службе Цэнтральнай ваеннай акругі (ЦВА) Расіі.

Яны пройдуць на палігоне Фахрабад. У вучэннях прымуць удзел байцы беларускага спецназа, а таксама вайскоўцы з Расіі, Арменіі, Казахстана, Таджыкістана і Кіргізіі.

У час актыўнай фазы вучэнняў ваенныя будуць штурмаваць умоўна захоплены баевікамі будынак з прымяненнем тэхнічных сродкаў разведкі і верталётаў.

У АДКБ уваходзяць Арменія, Беларусь, Казахстан, Кыргызстан, Расія і Таджыкістан, які старшынствуе ў арганізацыі ў 2021 годзе.

Нагадаем, што на мінулым тыдні завяршыліся вучэнні міратворчых сіл АДКБ "Нерушимое братство – 2021". Манеўры прайшлі 8-12 лістапада ў Татарстане на палігоне Казанскага вышэйшага танкавага каманднага вучылішча.

У іх прынялі ўдзел звыш 1,7 тысячы чалавек, больш за 300 адзінак узбраення, у тым ліку восем верталётаў Мі-8 і Мі-24, таксама шматфункцыянальныя знішчальнікі-бамбардзіроўшчыкі Су-34. Беларускую армію прадставілі ў асноўным ваеннаслужачыя з Брэсцкай вобласці.

Акрамя таго, у кастрычніку беларускія вайскоўцы ўдзельнічалі ў вучэннях АДКБ "Баявое брацтва - 2021". Яны праходзілі ў Таджыкістане ў непасрэднай блізкасці ад мяжы з Афганістанам, дзе нядаўна здарыўся дзяржпераварот.