Напярэдадні, 14 студзеня, у Беларусі сіноптыкамі быў аб'яўлены чырвоны ўзровень небяспекі з-за ветру. Стыхія разбушавалася амаль ва ўсіх рэгіёнах. Паводле звестак "Белэнерга", каля 500 населеных пунктаў мелі праблемы з падачай электрычнасці.
У сямі раёнах Мінскай вобласці пашкоджаны дахі будынкаў. Таксама моцныя парывы ветру справакавалі падзенні дрэў – толькі ў сталіцы каля тысячы выпадкаў. Работнікі МНС праводзілі распілоўку, вызвалялі праезныя часткі ад завалаў.
"Просім усіх быць уважлівымі і асцярожнымі. Калі назіраеце моцныя парывы ветру, па магчымасці ўстрымайцеся ад выхаду на вуліцу і паездак, не паркуйце аўтамабілі ля дрэў і хісткіх канструкцый", - адзначаюць у МНС Беларусі.
У некаторых раёнах Мінска ўраганны вецер зламаў рэкламныя шчыты і знёс прыпынкі грамадскага транспарту, раскідаў гандлёвыя палаткі.
У Баранавічах вецер паваліў цагельную агароджу на аўтамабілі. Таксама стала вядома, што на станцыі Орша-Цэнтральная цеплатраса ўпала на чыгуначныя пуці. Аб пацярпеўшых пакуль не паведамляецца.
Дрэннае надвор'е, паводле звестак МНС, захаваецца і ў суботу, 15 студзеня, - будзе вецер на большай частцы тэрыторыі краіны з парывамі да 15-20 м/с.
"Сёння на большай частцы тэрыторыі рэспублікі чакаецца ўзмацненне ветру парывамі да 15-20 м/с", - гаворыцца ў паведамленні экстранага ведамства.
Ратавальнікі папярэджваюць, што ў выніку непагадзі могуць адбывацца абрывы ліній электраперадач, пашкоджанні дахаў і падзенне дрэў.
Што да тэмпературы паветра на суботу, то прагноз ратавальнікаў такі: ад мінус трох да плюс трох градусаў цяпла, па паўночным усходзе краіны невялікія ападкі, месцамі слабы галалёд. Вадзіцелям трэба быць уважлівымі – на некаторых участках дарог можа быць галалёдзіца.
У нядзелю і панядзелак чакаецца тэмпература ад мінус сямі градусаў ноччу да плюс трох днём, на большай частцы краіны невялікія ападкі – снег і дождж. Моцны вецер, паводле інфармацыі ратавальнікаў, можна чакаць і на пачатку наступнага тыдня.
Таксама на Sputnik:
Амаль 1000 дрэў упалі ў Мінску з-за моцнага ветру ў пятніцу
Ураганны вецер у Мінску: паламаныя дрэвы і разбітыя вітрыны – фотафакт
У пятніцу і суботу ў Беларусі чакаецца моцны вецер