Золатавалютныя рэзервы Беларусі выраслі на 100 млн долараў

МІНСК, 7 лют – Sputnik. Золатавалютныя рэзервы Беларусі на 1 лютага 2022 года склалі 8,5 млрд долараў, пра гэта паведамілі ў прэс-службе Нацбанка.

Раней беларускія ўлады ўстанавілі правіла, што міжнародныя рэзервовыя актывы на пачатак бягучага года не павінны ўпасці ніжэй за адзнаку ў 6 млрд долараў. Цяпер гэты паказчык вышэйшы на 2,5 млрд долараў. Нагадаем, за снежань ЗВР знізіліся на 44,1 млн долараў (на 0,5%), за студзень – павялічыліся на 98,8 млн долараў (на 1,2%).

У Нацбанку лічаць, што міжнародныя рэзервы выраслі ў студзені за кошт паступлення валюты ў бюджэт, у тым ліку ад збірання экспартных пошлін. Таксама рэгулятар купляў замежную валюту на фондавай біржы.

Пры гэтым у студзені беларускі ўрад пагасіў знешнія і ўнутраныя даўгі ў замежнай валюце на суму каля 360 млн долараў.

Нагадаем, па выніках 2021 года ўлады вярнулі даўгі на агульную суму ў памеры 3,1 млрд долараў. У 2022-м Беларусі неабходна пагасіць 3,3 млрд долараў.

Раней Нацбанк устанавіў планку, ніжэй за якую не павінны апускацца золатавалютныя рэзервы краіны – 7 млрд долараў на 1 студзеня 2023 года. У 2020-м гэты паказчык складаў 7,3 млрд, пасля чаго апусціўся да 6 млрд.