Грызлоў аб рэферэндуме: волевыяўленне будзе сапраўды масавым

МІНСК, 26 лют – Sputnik. У суботу адбылася рабочая сустрэча Пасла РФ у Беларусі Барыса Грызлова з назіральнікамі ад СНД на рэспубліканскім рэферэндуме па ўнясенні змяненняў і дапаўненняў у Канстытуцыю, паведамілі ў прэс-службе пасольства.

Пасол нагадаў, што абмеркаванне пытанняў рэферэндуму пачалося яшчэ ў 2020 годзе. Беларускія ўлады, паводле яго слоў, зрабілі шэраг захадаў для нармалізацыі сітуацыі, аператыўна падрыхтавалі прапановы па ўнясенні змяненняў у Асноўны закон краіны.

Ён таксама звярнуў увагу на статыстыку па датэрміновым галасаванні, якое завершыцца сёння.

"Факты сведчаць аб тым, што волевыяўленне будзе сапраўды масавым: па стане на 26 лютага за чатыры дні датэрміновага галасавання ў рэферэндуме ўжо прынялі ўдзел 34,28% ад усіх грамадзян, уключаных у спіскі ўдзельнікаў", - падкрэсліў Грызлоў.

Пасол Расіі ў Беларусі адзначыў, што ацэньваць ход канстытуцыйных рэформ павінен выключна беларускі народ. Паводле яго слоў, менавіта ён - адзіная крыніца ўлады і носьбіт суверэнітэту.

Ён дадаў, што грамадзяне рэспублікі маюць дастатковую мудрасць, "каб без падказак і ўмяшання звонку вызначыцца", якім яны бачаць будучыню.

Барыс Грызлоў лічыць, што рэферэндум у нядзелю, 27 лютага, пройдзе "ў спакойнай, канструктыўнай абстаноўцы".

Барыс Грызлоў выказаў надзею, што пасля рэферэндуму па Канстытуцыі ў Беларусі будуць створаны спрыяльныя ўмовы для стабільнага эканамічнага росту і грамадзянскай згоды на працяглую перспектыву.

"Надзейным фундаментам бяспекі, развіцця, упэўненасці беларусаў у заўтрашнім дні з`яўляецца шматпланавае супрацоўніцтва з Расіяй", - лічыць кіраўнік расійскай дыпмісіі.

Ён нагадаў пра сустрэчу прэзідэнтаў дзвюх краін Уладзіміра Пуціна і Аляксандра Лукашэнкі ў лістападзе мінулага года, якая дала новы імпульс адносінам Расіі і Беларусі. Нагадаем, тады падчас пасяджэння Вышэйшага дзяржаўнага савета Саюзнай дзяржавы прэзідэнты зацвердзілі пакет важных інтэграцыйных дакументаў, у тым ліку 28 саюзных праграм.