СААЗ не ўпэўнена, што распаўсюджванне воспы малпаў атрымаецца стрымаць цалкам

МІНСК, 1 чэр – Sputnik. Сусветная арганізацыя аховы здароўя (СААЗ) у цяперашні час не ведае, ці магчыма цалкам стрымаць распаўсюджванне воспы малпаў сярод людзей, пра гэта заявіў дырэктар Еўрапейскага рэгіянальнага бюро СААЗ Ханс Клюге.

Ён мяркуе, што для эфектыўнага рэагавання на ўспышку воспы малпаў пакуль не патрэбны настолькі маштабныя меры, як для барацьбы з COVID-19, паколькі вірус воспы распаўсюджваецца іншым чынам. Тым не менш неабходна хутка і значна скараціць распаўсюджванне захворвання, для чаго неабходна дакладная камунікацыя, ізаляцыя хворых, а таксама адсочванне іх кантактаў.

Клюге ўдакладніў, што распаўсюджванне віруса адбылося на фоне адмен у многіх краінах абмежаванняў на паездкі, якія раней былі ўведзены з-за каронавіруса. Паколькі на працягу лета будуць праводзіцца шмат масавых мерапрыемстваў, гэта можа садзейнічаць далейшаму распаўсюджванню інфекцыі.

Пры гэтым прадстаўнік СААЗ адзначыў, што гэтыя ж мерапрыемствы можна выкарыстоўваць для павышэння дасведчанасці людзей.

Раней у арганізацыі заяўлялі, што большая частка насельніцтва свету ўразлівая да віруса воспы малпаў, бо вакцынацыя супраць натуральнай воспы, якая забяспечвае некаторую перакрыжаваную абарону, у шэрагу краін была спынена з 1980 года ці раней.

Па даных Міністэрства аховы здароўя Беларусі, неабходных сродкаў дыягностыкі воспы малпаў у краіне няма – іх толькі распрацоўваюць. У выпадку ўзнікнення падазрэнняў на захворванне, біяматэрыял адвезлі б на аналіз у Расію – у цэнтры "Вектар" Расспажыўнагляду тэсты ёсць.

Пры гэтым у беларускім ведамстве рызыкі траплення інфекцыі ў краіну ацэньваюць як нізкія. Аднак, каб прадухіліць верагоднасць завозу ў краіну воспы малпаў, у пунктах пропуску на мяжы рэспублікі ўзмоцнены меры санітарна-каранціннага кантролю. Акрамя таго, медработнікаў дадаткова навучаюць дыферэнцыяльнай дыягностыцы захворвання.