МАРГ патлумачыў, навошта ўвесь час сочыць за цэнамі

МІНСК, 20 чэр – Sputnik. Маніторынг цэн у Беларусі праводзіцца пастаянна і ўжо ёсць вынікі гэтай работы, заявіў міністр антыманапольнага рэгулявання і гандлю Аляксей Багданаў у эфіры тэлеканала СТБ.

Маніторынг неабходны, таму што сёння вельмі моцны ўплыў на эканоміку аказвае так званая імпартаваная інфляцыя, гэта значыць высокія цэны на тыя тавары, якія ўвозяцца ў краіну. А на росце ўнутраных цэн, паводле слоў міністра, адбіваецца павышэнне кошту энерганосьбітаў.

Таму, каб айчынныя вытворцы і пастаўшчыкі імпартных тавараў "не балаваліся", МАРГ разам з Камітэтам дзяржкантролю, урадам і Федэрацыяй прафсаюзаў праводзіць гэтыя маніторынгі, адсочвае сітуацыю і трымае гэтае пытанне пад кантролем.

Вынікі гэтай працы ўжо ёсць, так, паводле інфармацыі Багданава, колькасць парушэнняў знізілася на 12% у адносінах да ўзроўню мінулага года.

Са студзеня па май гэтага года спецыялісты МАРГ правялі цэнавы кантроль на спажывецкім рынку краіны. У 481 выпадку не выконваліся патрабаванні ўказаў, якія рэгулююць пытанні цэнаўтварэння.

Спецыялісты накіравалі 180 рэкамендацый аб устараненні парушэнняў. Штрафы атрымалі 224 службовыя асобы, а агульны памер санкцый склаў 1 182,5 тысячы рублёў.

У міністэрстве нагадалі, што раней улады ўвялі цэнавае рэгуляванне на мыла, туалетную паперу, сурвэткі, падгузнікі, жаночыя пракладкі, мыйныя і чысцячыя сродкі, зубную пасту, абутак і панчошна-шкарпэткавыя вырабы для дзяцей.

На думку спецыялістаў МАРГ, асноўны ўплыў на інфляцыю прадаўжае аказваць павелічэнне затрат беларускіх вытворцаў на падаражэлую сыравіну і павышэнне цэн на паліва.

Акрамя таго, на спажывецкі рынак працягваюць ціснуць ваганні расійскага рубля на валютным рынку, парушэнні лагістычных ланцужкоў і зніжэнні паставак з Украіны.