Падатак для агароднікаў, пчаляроў і грыбнікоў хочуць увесці ў Беларусі

МІНСК, 26 сне – Sputnik. У Беларусі плануюць вылічваць падаходны падатак з тых, хто прадае агародніну, садавіну, мяса або мёд з асабістага падворка, а таксама займаецца зборам грыбоў, ягад, арэхаў, лекавых раслін і іншай дзікарослай прадукцыі для далейшай здачы.

Такая норма змяшчаецца ў варыянце праекта змяненняў у Падатковы кодэкс, апублікаваным на афіцыйным сайце міністэрства фінансаў Беларусі. Законапраект ужо адобрылі ў двух чытаннях дэпутаты і сенатары.

Падаткам будзе абкладацца сума, якая перавышае 200 базавых велічынь (5800 беларускіх рублёў). І гаворка ідзе пра тых, хто пакажа дадзены від даходу пры абгрунтаванні дарагой пакупкі (напрыклад, аўтамабіля) пры ацэнцы даходаў і расходаў з боку падатковых органаў.

Заканадаўцы таксама прапануюць увесці падатак за першую кватэру, павялічыць збор для ўладальнікаў аграсядзіб і рамеснікаў, а таксама скараціць спісак відаў дзейнасці ІП, якія абкладаюцца адзіным падаткам.

Падатак для рамеснікаў збіраюцца падняць з 58 да 62 рублёў у год, а з 2023 года і ўвогуле адмяніць.

Праўкі ў Падатковы кодэкс прадугледжваюць павышэнне ставак акцызаў на піва і цыгарэты. З 2022 года маюць намер увесці акцызы на вадкасці для электронных сістэм курэння (электронныя цыгарэты, парагенератары, вэйпы) і на нетытунёвыя нікатыназмяшчальныя вырабы.

Мясцовым уладам хочуць дазволіць павышаць стандартную стаўку падатку на прыбытак (18%) у межах двух адсоткаў. Як удакладнілі ў парламенце, "прадугледжаны мэтавы характар ​​выкарыстання гэтых сродкаў". У прыватнасці, зборы накіруюць на будаўніцтва інжынернай і транспартнай інфраструктуры.